Некарэктныя балансы па картках «Беларусбанка». БПЦ паведаміў пра тэхнічны збой

Рэдакцыя Reform.news · 30 снежня 2025, 13:14

https://reform.news/be/nekarjektnyja-balansy-pa-kartkah-belarusbanka-bpc-pavedami-pra-tjehnichny-zboj/

«Банкаўскі працэсінгавы цэнтр» паведаміў пра тэхнічны збой, з-за якога сёння могуць адлюстроўвацца некарэктныя балансы па картках «Беларусбанка».

“ААТ «Банкаўскі працэсінгавы цэнтр» інфармуе, што ў сувязі з тэхнічным збоем, які адбыўся ў апаратна-праграмным комплексе, 30.12.2025 могуць мець месца некарэктныя балансы па картках ААТ «АСБ Беларусбанк», — гаворыцца ў паведамленні.

У БПЦ запэўнілі, што цяпер вядуцца работы па ліквідацыі наступстваў збою, і ў бліжэйшы час “балансы па картках будуць урэгуляваныя”.

Нагадаем, у ліпені ў Беларусі ўжо адбыўся тэхнічны збой, у выніку якога адмоўныя балансы адлюстроўваліся па картках «Беларусбанка», «Белінвестбанка» і «Белаграпрамбанка». Тады яго ліквідацыя і аднаўленне балансаў занялі больш за суткі.