Наўседа падпісаў закон аб будаўніцтве палігона ў Капчамесцісе

Рэдакцыя Reform.news · 30 красавіка 2026, 14:54

https://reform.news/be/na-seda-padpisa-zakon-ab-buda-nictve-paligona-kapchamescise/

Прэзідэнт Літвы Гітанас Наўседа падпісаў законы аб стварэнні ваеннага палігона ў Капчамесцісе і пашырэнні Таурагскага палігона.

«Прынятыя Сеймам пераважнай большасцю галасоў законы аб палігонах заяўляюць аб цвёрдай рашучасці Літвы ўмацоўваць свае абарончыя магчымасці і стрымліванне, а таксама паслядоўна ўносіць уклад у калектыўную абарону НАТА. Палігон Капчамесціс мае жыццёва важнае значэнне для фарміравання нацыянальнай дывізіі і эфектыўнай падрыхтоўкі салдат. А яго стратэгічнае размяшчэнне ўздоўж Сувалкскага калідора ўмацоўвае абарончыя магчымасці ўсяго рэгіёна і наша ўзаемадзеянне з партнёрамі па НАТА», – заявіў Наўседа.

Ён прапанаваў назваць палігон у Капчамесцісе ў гонар Эміліі Плятэр. Палігон будзе мець брыгадны ўзровень.

Мінабароны Літвы сёння паведаміла аб падпісанні дадатковага кантракта на пастаўку ўстановак HIMARS. Ён прадугледжвае атрыманне дадатковых баявых машын і боепрыпасаў, а таксама абсталявання кіравання і сувязі. Чакаецца, што першай батарэяй HIMARS Літва абзавядзецца ў гэтым годзе.