Фото: facebook.com/UkraineMFA
Міністэрства замежных спраў Украіны выказала падтрымку рашэнню Літвы ўвесці надзвычайную сітуацыю на фоне сістэматычнага запуску з тэрыторыі Беларусі паветраных шароў з кантрабандай. Ведамства падкрэсліла, што рэагаваць на такія дзеянні неабходна не толькі Літве, але і Еўрапейскаму саюзу ў цэлым.
У МЗС адзначылі, што падобныя крокі беларускага рэжыму ствараюць пагрозу бяспецы міжнародных авіяпералётаў у і з літоўскіх аэрапортаў, а таксама падвяргаюць рызыцы жыццё і здароўе людзей, маёмасць і навакольнае асяроддзе. У Кіеве разглядаюць тое, што адбываецца, як чарговую гібрыдную атаку рэжыму Лукашэнкі супраць Літвы, усходняга флангу НАТА і дзяржаў ЕС. У ведамстве таксама ўпэўнены, што Мінск дзейнічае пры падтрымцы Расіі.
Украінскае знешнепалітычнае ведамства нагадала, што папярэднія «недружалюбныя дзеянні» з боку Беларусі ўключалі «аперацыі па захопе актываў кампаній ЕС, шантаж, акты сабатажу, распаўсюджанне прапаганды і дэзынфармацыі». Паводле меркавання МЗС, Расія з прыцягненнем саюзнікаў пашырае сваю агрэсію і імкнецца дэстабілізаваць сітуацыю не толькі ва Украіне, але і ў іншых краінах Еўропы.
Украіна заклікала ўзмацніць ціск на ўдзельнікаў агрэсіі, у тым ліку праз увядзенне новых або пашырэнне дзейных санкцый супраць Беларусі, яе фізічных і юрыдычных асоб. У ведамстве падкрэслілі, што хуткасць, рашучасць і адзінства партнёраў маюць ключавое значэнне для супрацьдзеяння расійскай агрэсіі, аднаўлення тэрытарыяльнай цэласнасці Украіны і дасягнення справядлівага і трывалага міру.
Кіеў выказаў поўную салідарнасць з Літвой і пацвердзіў гатоўнасць дзяліцца досведам, набытым у ходзе вайны, у тым ліку тэхналагічнымі рашэннямі.
Нагадаем, рэжым НС быў уведзены па ўсёй тэрыторыі Літвы 9 снежня. У прэс-рэлізе літоўскага ўрада падкрэслівалася, што ён не адаб’ецца на жыцці звычайных грамадзян, адначасова сілавыя ведамствы Літвы атрымаюць магчымасць для больш цеснага ўзаемадзеяння і прыцягнення да аперацый вайскоўцаў.