Міністэрства замежных спраў Літвы мае намер накіраваць Беларусі ноту пратэсту з-за беспілотніка, які быў сёння збіты пад Каўнасам. Раней літоўскія вайскоўцы заявілі, што ён ляцеў з боку Беларусі, а беларускі бок не паведамляў літоўскаму пра дрон.
«Ва ўсіх выпадках, калі адбываюцца парушэнні паветранай прасторы, мы атрымліваем паведамленне ад Ваенна-паветраных сіл – калі, дзе, месца, каардынаты, што адбылося. Ва ўсіх выпадках мы рыхтуем ноту і заўсёды ўручаем яе той краіне, адкуль, скажам, прыляцеў самалёт або іншы аб’ект. У дадзеным выпадку гаворка ідзе пра Беларусь. Калі будзе праведзена расследаванне і па абломках будзе ўстаноўлена, чый гэта ўрэшце беспілотнік, тады мы зробім і іншыя дзеянні», – сказаў у Сейме міністр замежных спраў Кястуціс Будрыс, перадае LRT.
Ён таксама дадаў, што Літва афіцыйна праінфармавала пра інцыдэнт саюзнікаў і партнёраў і прапануе правесці дыскусіі па гэтай тэме ў рамках ЕС і НАТА.
