МУС Расіі паведаміла аб ліквідацыі метадонавага бізнесу пры дапамозе беларускіх калег

Рэдакцыя Reform.news · 23 сакавіка 2026, 10:26

https://reform.news/be/mus-rasii-pavedamila-ab-likvidacyi-metadonavaga-biznesu-pry-dapamoze-belaruskih-kaleg/

Пад Масквой ліквідавана лабараторыя па вытворчасці метадону, якую выкарыстоўвала транснацыянальная арганізаваная група. Пра гэта паведамілі ў прэс-службе МУС Расіі. Адзначаецца, што аперацыя была праведзена пры садзейнічанні Галоўнага ўпраўлення па наркакантролі і супрацьдзеянні гандлю людзьмі Крымінальнай міліцыі МУС Беларусі.

“Папярэдне ўстаноўлена, што крымінальным бізнесам кіраваў грамадзянін адной з краін блізкага замежжа. Ён неаднаразова прыязджаў у нашу краіну і ў арандаваных дамах вырабляў наркотык”, — гаворыцца ў паведамленні.

У лютым гэтага года такая лабараторыя была ліквідавана на тэрыторыі Чэхаўскага раёна Маскоўскай вобласці. Тады былі затрыманыя падазраваны і яго саўдзельніца-расіянка. У лабараторыі канфіскавалі больш за 11 кг метадону, прэкурсары і спецыяльнае абсталяванне. У яшчэ адным арандаваным доме ў Мажайскім раёне было канфіскавана дадаткова 2 кг метадону. Адзначаецца, што наркотык прадавалі як на тэрыторыі РФ, так і Беларусі.

«Такім чынам, узаемадзеянне і своечасовы абмен інфармацыяй паміж калегамі з МУС Расіі і МУС Рэспублікі Беларусь дазволілі спыніць паступленне на наркарынкі больш за 65 тысяч разавых доз небяспечнага наркотыку, ужыванне якога звязана з высокай смяротнасцю”, — дадалі ў прэс-службе.