Міністэрства антыманапольнага рэгулявання і гандлю Беларусі днямі заявіла, што ўводзіць «нарматыў беларускага ў гандлёвым асартыменце». Рашэнне было аргументавана мэтамі нацыянальнай бяспекі.
Пазней была апублікавана пастанова МАРГ №74, якая датычыцца асартыментных пералікаў. Былі ўнесены змены ў шэраг заўваг да пералікаў, з якіх вынікала, што асартымент па шэрагу таварных пазіцый павінен забяспечвацца за кошт тавараў беларускай вытворчасці.
На семінары намесніца міністра Святлана Караткевіч патлумачыла, што пастановай прадпісваецца забяспечваць у продажы мінімальную колькасць разнавіднасцей тавараў выключна за кошт прадукцыі беларускай вытворчасці. Пры гэтым арганізацыі гандлю могуць прапаноўваць любую колькасць тавараў з іншых краін звыш мінімальнай колькасці пазіцый, прадугледжаных абавязковым пералікам.
Пастанова павінна ўступіць у сілу з 10 верасня. За гэты час арганізацыі гандлю павінны скарэктаваць і ўзгадніць свае пералікі.
МАРГ у далейшым мае намер праводзіць маніторынгі па долі беларускіх тавараў.