Фото: olympics.com
Міжнародны алімпійскі камітэт (МАК) больш не рэкамендуе ўжываць абмежаванні на ўдзел беларускіх спартсменаў, уключаючы каманды, у спаборніцтвах пад эгідай міжнародных федэрацый і арганізатараў міжнародных спартыўных мерапрыемстваў.
Адпаведнае рашэнне было прынята выканаўчым камітэтам МАК сёння.
«Сёння Выканкам МАК адмяніў рэкамендаваныя ўмовы ўдзелу для міжнародных федэрацый і арганізатараў міжнародных спартыўных мерапрыемстваў ад 28 лютага 2022 года і 28 сакавіка 2023 года ў той частцы, якая датычыцца Беларусі і беларускіх спартсменаў, уключаючы ахоўныя меры», — гаворыцца ў прэс-рэлізе МАК.
МАК заяўляе, што ўдзел спартсменаў у міжнародных спаборніцтвах не павінен абмяжоўвацца дзеяннямі іх урадаў, уключаючы ўдзел у вайне або канфлікце.
Таксама адзначаецца, што беларускія спартсмены ўдзельнічалі ў многіх міжнародных спаборніцтвах, уключаючы дзве Алімпіяды, як індывідуальныя нейтральныя спартсмены, і гэта не прывяло да якіх-небудзь інцыдэнтаў на спартыўных арэнах і за іх межамі.
МАК падкрэсліў, што Нацыянальны алімпійскі камітэт Беларусі «адпавядае патрабаванням і выконвае Алімпійскую хартыю».
Што датычыцца Расійскага алімпійскага камітэта, МАК не змяніў рашэння аб яго адхіленні, нягледзячы на «канструктыўны дыялог аб яго дыскваліфікацыі». У камітэце таксама заявілі, што захоўваюць занепакоенасць у сувязі з данымі аб расійскай антыдопінгавай сістэме, якія цяпер вывучае World Anti-Doping Agency (WADA).