Аляксандр Лукашэнка падчас сённяшняй справаздачы ўрада аб працы эканомікі ў 2025 годзе раскрытыкаваў чыноўнікаў за эканамічныя вынікі. Традыцыйна ён вырашыў матываваць іх на эфектыўную працу з дапамогай пагроз. Яны датычыліся паўтарэння 2020 года, а таксама адпраўкі винаватых у стратныя прадпрыемствы.
“Часта кажу: вы забылі 2020 год! І калі вы думаеце, што 2020 год — гэта там знешнія ворагі нейкія… Ды не, калі б не было ўнутранай нашай адпаведнай сітуацыі, ніякія б ворагі сюды не ўлезлі. А калі б і ўлезлі, то мы б іх спынілі ў першыя дні. Але наша самазаспакоенасць… Назіраю гэта і цяпер, усюды.
Там, дзе бюджэт, там, дзе дзяржава, — толку няма. Давайце дамовімся: мы — гаспадары на гэтай зямлі, і пра вашу працу я буду судзіць па-гаспадарску”, — сказаў ён.
У якасці негатыўнага прыкладу Лукашэнка прывёў дзяржаўную прапаганду.
“На першае месца вылучаюцца сродкі масавай інфармацыі. Вы ведаеце маё стаўленне да СМІ. Вайна ідзе на полі СМІ. І я вось гляджу новы канал, БТ-1, 2, 3 і іншыя… Слухайце, новы навінавы канал: тыдзень прайшоў, навіна была тыдзень таму (напрыклад, раніцай паглядзеў: Трамп яшчэ не вырашыў, што рабіць з Іранам). Хлопцы, ды гэта ён тыдзень таму сказаў. Няўжо гэта галоўная навіна? І ўсюды так. Вось гэтая закарузласць, безадказнасць людзей”, — сказаў ён.
На яго думку, чыноўнікі не праяўляюць ініцыятыву, пакуль ён не ўкажа на недахопы.
“Вы што, так будзеце і далей жыць? Убачыў недзе нешта Прэзідэнт — пнуў. Не пнуў — ну і добра”, — сказаў ён.
Тут жа ён сказаў, што яму не падабаецца, як прыбіраюць снег з загарадных дарог.
“Еду — карыта. Ачысцілі снег, налева-направа скінулі. Потым дожджык, і атрымаўся бар’ер “жалезабетонны”. Вось цяпер пойдуць дажджы, адліга і ўтворыцца карыта — вада будзе на асфальце. Мы зруйнуем усе дарогі. Няўжо нельга было знесці снег не на ўзбочыну, а туды ў адхон, каб вада сцякала ўсю вясну, калі будзе таяць снег. У нас што, дарожнікі гэтага не ведаюць? Ці ў нас віцэ-прэм’ера няма, які гэтым займаецца?” — сказаў ён.
Не спадабаліся яму і работы ў Жодзіне.
“Разрылі Жодзіна гэтае. Тое ж — паказуха, Прэзідэнт жа будзе ехаць. Трубы цягаюць, кабель цягнуць нейкі і іншае. Я думаю: хлопцы, а вы што, у кастрычніку–лістападзе не маглі гэта скончыць? Ну навошта вы людзей (сёння мароз, заўтра — дождж) цягаеце па гэтай гразі і ладзіце нейкую паказуху?” — сказаў ён.
Лукашэнка ўспомніў і пра яго патрабаванне наконт вулічнага асвятлення.
“Ах, 10 хвілін не туды, 10 хвілін не сюды. Ды гэта эканомія — палова павышэння пенсій. Гэта грошы, усюды грошы. Мы гэта не лічым. А навошта лічыць? Гэта ж бюджэт… Ну калі хтосьці хоча свяціцца — няхай свеціцца, уключае ліхтары ў сябе, але плаціць за гэта”, — сказаў ён.
Лукашэнка звярнуў увагу на правал у прамысловасці, праблемы ў знешнім гандлі, апераджальны рост зарплат у параўнанні з прадукцыйнасцю працы.
Ён лічыць, што ўрад павінен мабілізавацца і не дапусціць правалу пяцігодкі ў першы год. Сёння Белстат паведаміў, што ВУП краіны ў студзені прасеў на 1,2%.
“Прама цяпер першачарговыя, імгненныя задачы ўрада — тэрмінова спыніць спад у прамысловасці і разгрузіць склады. Усе ключавыя прадпрыемствы яшчэ ўчора павінны быць узяты літаральна на ручны кантроль. Упаси вас бог скідваць са складоў камусьці без грошай тую ці іншую прадукцыю”, — сказаў ён.
Лукашэнка прапанаваў накіраваць спецыялістаў міністэрстваў або канцэрнаў на прадпрыемствы, дзе яны правядуць рэвізію працы маркетолагаў, службаў збыту, сістэм закупак. Іх задача — тэрмінова знайсці новыя кантракты.
“Задача адна — тэрмінова знайсці новыя кантракты. Далей — сігнал наверх свайму міністру, няхай пад гэты экспарт (асабліва на новыя рынкі) шукае разам з віцэ-прэм’ерам і банкамі фінансавую падтрымку”, — сказаў ён.
Лукашэнка сёння таксама казаў, што эканоміка знаходзіцца амаль на ваенным становішчы. Яе асадзілі і з Усходу, і з Захаду. Аднак ва ўрадзе ён не бачыць адпаведнай мабілізацыі.
“Пакуль не адчуваецца ваеннага становішча, мабілізацыі кадраў і жадання яе выконваць. Хтосьці думае адседзецца або прыкрыцца “аб’ектыўнымі прычынамі”. Не атрымаецца. Калі абвясцілі час канкрэтных спраў, то і за іх адсутнасць будзе канкрэтны попыт”, — сказаў ён.
“Характарыстыку кожнаму кіраўніку цяпер будуць даваць профільны міністр і губернатар. Не важна, якой формы арганізацыя або калі гэта рай-гарвыканкам. З ваўчыным білетам нідзе ў краіне на кіраўнічай працы вас больш не будзе. Максімум пойдзеце падымаць стратны калгас або завод”, — прыгразіў Лукашэнка.
Паводле яго слоў, у Беларусі прыняты ўсе найважнейшыя дакументы да пачатку новага перыяду.
“Сістэмнасць у выкананні задач, аператыўнасць, падрыхтоўка рашэнняў, калі трэба, жорсткая выканаўчая дысцыпліна — аснова вашай далейшай выніковасці. Хочаце працаваць — давайце будзем працаваць”, — падсумаваў ён.
