Аляксандр Лукашэнка падпісаў дакумент аб далучэнні Беларусі да Рады міру — новай арганізацыі пад старшынствам Дональда Трампа.
«Прэзідэнт ад імя Рэспублікі Беларусь падпісаў дакумент аб далучэнні Беларусі да Рады Міру і выкананні палажэнняў Статута Рады Міру.
У поўнай адпаведнасці з прадугледжанай працэдурай, якая была абазначана ў лісце Прэзідэнта ЗША Дональда Трампа», — паведамляе прэс-служба Лукашэнкі.
На відэа, апублікаваным прэс-службай, бачны тэкст дакумента:
«Ваша Правасхадзіцельства,
Маю гонар спаслацца на запрашэнне Старшыні Рады Міру ад 16 студзеня 2026 года, якое прапаноўвае згоду Рэспублікі Беларусь быць звязанай са Статутам Рады Міру, тэкст якога быў прыкладзены да гэтага запрашэння Старшыні.
Маю гонар таксама паведаміць Ураду Злучаных Штатаў Амерыкі ў яго ролі дэпазітару Статута, што Рэспубліка Беларусь гэтым прымае Статут Рады Міру з даты гэтага ліста, які ўяўляе сабой афіцыйнае паведамленне Рэспублікі Беларусь аб згодзе быць звязанай Статутам.
Прыміце, Ваша Правасхадзіцельства, запэўненні ў маёй вельмі высокай павазе.
Аляксандр Лукашэнка
Яго Правасхадзіцельству
Марка Рубіа
Дзяржаўнаму сакратару
Злучаных Штатаў Амерыкі».
19 студзеня МЗС Беларусі паведаміў аб прапанове Беларусі ад Трампа далучыцца да Рады міру ў кантэксце ўрэгулявання сітуацыі ў Сектары Газа.
МЗС палічыў запрашэнне прызнаннем асабістых заслуг Лукашэнкі і заявіў, што Беларусь гатовая ўдзельнічаць у Радзе міру і спадзяецца, што мандат арганізацыі будзе пашыраны на іншыя міжнародныя канфлікты.
Як паведамлялі СМІ, запрашэнне ад Трампа атрымалі больш за 50 дзяржаў.
