Фото: ГТК
Праз больш чым два месяцы пасля таго, як Беларусь дазволіла выезд затрыманым літоўскім грузавікам, у краіне застаюцца да 200 адзінак транспарту, уключаючы цягачы і паўпрычэпы. Пра гэта паведаміў прэзідэнт літоўскай асацыяцыі перавозчыкаў Linava Эрландас Мікенас, піша LRT са спасылкай на ELTA.
Паводле яго слоў, частку тэхнікі проста нявыгадна забіраць, паколькі плата за захоўванне перавышае кошт саміх аўтамабіляў.
«Не ўсе транспартныя сродкі выгадна забіраць, паколькі так званая плата за захоўванне перавышае іх кошт. А іншыя перавозчыкі збіраюць сродкі і ўсё яшчэ спадзяюцца вярнуць свае грузавікі», — сказаў ён.
Збор за адзін аўтапоезд складае каля 6 тысяч еўра.
«Ёсць высокая верагоднасць, што так і будзе, што яны застануцца», — лічыць кіраўнік асацыяцыі.
Паводле слоў прадстаўніка Службы аховы дзяржаўнай мяжы Літвы Гедруса Мішуціса, ведамства не адсочвае і не мае даных пра тое, колькі грузавікоў усё яшчэ застаецца ў Беларусі. Паводле яго слоў, з 23 сакавіка, калі грузавікі, што затрымаліся, атрымалі магчымасць вярнуцца, мяжу перасеклі да тысячы цягачоў.
«28 красавіка вярнулася 916 грузавікоў. У апошнія дні, калі мы яшчэ рэгістравалі гэтыя патокі, штодня праходзіў адзін-два грузавікі. Тады не было неабходнасці лічыць, таму мы дакладна не ведаем, колькі іх вярнулася. Магчыма, іх колькасць дасягае тысячы», — сказаў ён.
Паводле яго слоў, трафік грузавікоў праз Мядзінінкай і Шальчынінкай скараціўся, аднак пункты працуюць у штатным рэжыме. Чэргі значна зменшыліся ў параўнанні з дакрызісным перыядам. Калі раней грузавікі стаялі суткамі, цяпер чаканне ў Мядзінінкаі складае 2–4 гадзіны, а ў Шальчынінкаі бываюць моманты, калі чэргаў няма зусім. Штодня з Мядзінінкая ў Беларусь выязджае 120–180 грузавікоў, а з Шальчынінкая — ад 40 да 100 грузавых аўтамабіляў.
Паводле слоў Мікенаса, грузапатокі скараціліся да мінімуму, паколькі грузы былі пераразмеркаваныя і ідуць праз Польшчу.
Нагадаем, Беларусь з восені 2025 года ўтрымлівала грузавікі з літоўскай рэгістрацыяй у адказ на закрыццё мяжы Літвой. Беларускія ўлады змясцілі аўтамабілі на спецыяльныя платныя стаянкі і не выпускалі іх некалькі месяцаў. Беларусь дазволіла выезд грузавікоў з 23 сакавіка пасля перамоў Аляксандра Лукашэнкі і спецпасланніка прэзідэнта ЗША Джона Коўла. Перавозчыкам дазваляецца забраць грузавікі пасля ўнясення платы за стаянку.
Паводле даных беларускага боку, усяго ў Беларусі на стаянках утрымлівалася больш за 1,9 тыс. транспартных сродкаў, у тым ліку цягачоў, прычэпаў і паўпрычэпаў.
Старшыня беларускага Дзяржаўнага мытнага камітэта Уладзімір Арлоўскі раней заяўляў, што Беларусь мае намер закрыць пытанне з літоўскімі фурамі да канца мая. Паводле яго сцвярджэння, амаль 1,7 тысячы літоўскіх грузавых аўтамабіляў пакінулі Беларусь, дзе яны знаходзіліся з лістапада 2025 года.