Фото: БКК
Пастаўкі беларускага калію ў КНР у вартасным выражэнні працягнулі расці ў ліпені. На гэта ўказваюць даныя мытнай статыстыкі Кітая за сем месяцаў. КНР летам гэтага года значна павялічыла імпарт калійных угнаенняў у параўнанні з аналагічным перыядам мінулага года на фоне росту цэн.
Кітай у студзені-ліпені імпартаваў 10 млн т калійных угнаенняў, што на 47,9% больш, чым летась за той жа перыяд. У вартасным выражэнні імпарт вырас на 84,9% да 3,63 млрд долараў.
У ліпені КНР закупіла 1,27 млн т калійных угнаенняў, што перавышае леташні паказчык у 2,4 раза. Пры гэтым у вартасным выражэнні імпарт вырас у 2,7 раза да 461,3 млн долараў.
Імпарт калійных угнаенняў з Беларусі ў студзені-ліпені склаў 809,86 млн долараў, што ў 2,05 раза больш, чым за аналагічны перыяд мінулага года. Пастаўкі павялічыліся таксама і з іншых краін: з Расіі — на 62,2% да 1,18 млрд долараў, з Канады — на 85,9% да 596,1 млн долараў, з Лаоса — у 2,2 раза да 651,1 млн долараў, з Ізраіля — на 57,9% да 170 млн долараў.
У ліпені з Беларусі кітайскія пакупнікі імпартавалі калійных угнаенняў на 113,6 млн долараў, што ў 6,5 раза больш, чым за аналагічны месяц мінулага года. У параўнанні з чэрвенем гэтага года пастаўкі выраслі амаль удвая.
Найбуйнейшым пастаўшчыком калію ў КНР у ліпені была Расія, дзе былі закупленыя ўгнаенні на 148,4 млн долараў, што на 80,6% больш, чым год таму, а другім па аб’ёмах пастаўшчыком стаў Лаос, імпарт з якога вырас у 1,9 раза да 83,5 млн долараў. Ліпеньскія закупкі ў Канадзе выраслі ў 2,9 раза да 4,72 млн долараў.
Паводле даных кітайскай мытнай статыстыкі, агульны кошт імпарту тавараў з Беларусі за сем месяцаў вырас на 33,2% да 1,26 млрд долараў.