Коўл у Варшаве сустрэўся з прэзідэнтам Польшчы

Рэдакцыя Reform.news · 28 красавіка 2026, 13:19

https://reform.news/be/ko-l-u-varshave-sustrje-sja-z-prjezidjentam-polshchy/

Спецыяльны пасланнік прэзідэнта ЗША па Беларусі Джон Коўл у панядзелак меў насычаную праграму ў Варшаве. Ён сустрэўся не толькі з міністрам замежных спраў і віцэ-прэм’ерам Радаславам Сікорскім, але і з прэзідэнтам Польшчы.

“Прэзідэнт Польшчы Караль Наўроцкі прыняў у панядзелак спецыяльнага пасланніка прэзідэнта ЗША Дональда Трампа па Беларусі Джона Коўла”, — паведаміла сёння днём канцылярыя польскага прэзідэнта.

На апублікаванай фатаграфіі сустрэчы таксама можна ўбачыць супрацоўнікаў апарату прэзідэнта Польшчы і прадстаўнікоў пасольства ЗША. Падрабязнасці перамоваў не прыводзяцца.

Раней раніцай пра сустрэчу з Коўлам заявілі ў МЗС Польшчы. Радаслаў Сікорскі пракаментаваў яе ўсяго двума словамі: “Важныя справы”.

Пра ўсе сустрэчы паведамлялася толькі ў сетцы X. Джон Коўл пакуль ніяк не адгукнуўся на пасты польскага МЗС і канцылярыі прэзідэнта.