Кітайскія і беларускія вайскоўцы будуць сумесна праходзіць навучанне па лініі міратворчасці. Пра гэта стала вядома падчас сустрэчы міністра абароны Беларусі Віктара Хрэніна з яго кітайскім калегам Дун Цзюнем.
«Мы актыўна пачалі ўзаемадзеянне ў галіне міратворчай дзейнасці. У гэтым плане хацеў бы выказаць падзяку за запрашэнне на курсы па лініі міратворчасці. Мы абавязкова возьмем у іх удзел, што дазволіць нашым афіцэрам атрымаць каштоўны досвед кітайскага боку па гэтым напрамку», – сказаў ён.
У сваю чаргу беларускі бок гатовы прапанаваць кітайскім вайскоўцам свае адукацыйныя магчымасці.
«Дасягнутыя ў чэрвені дамоўленасці аб навучанні кітайскіх вайскоўцаў у Ваеннай акадэміі Рэспублікі Беларусь сталі праявай даверу і высокай ацэнкай сістэмы ваеннай адукацыі Рэспублікі Беларусь.
Мы са свайго боку гатовыя пашыраць пералік спецыяльнасцей пад канкрэтныя запыты нашых кітайскіх сяброў», — сказаў генерал-лейтэнант Віктар Хрэнін.
Бакі таксама абмеркавалі вынікі сумесных вучэнняў і перспектыўныя напрамкі супрацоўніцтва.
«Трэба раскрываць патэнцыял супрацоўніцтва ў новых сферах. Формы ўзброенага супрацьстаяння змяніліся. У ваеннай сферы ўзрастае роля тэхналогій — гэта стварае і выклікі, і магчымасці. Мы можам разам сфакусавацца на развіцці сіл новай якасці, каб дасягнуць далейшага прагрэсу», – адзначыў кітайскі міністр.
