Фото: КГК
Камітэт дзяржаўнага кантролю прад’явіў буйныя падатковыя прэтэнзіі да бізнесу па імпарце і продажы цюльпанаў. Узбуджаны крымінальныя справы. Уласнікі бізнесу падазраюцца ва ўхіленні ад выплаты падаткаў, рэалізацыі прадукцыі па заніжанай вартасці і падатковым махлярстве.
Як паведамілі ў КДК, сялянска-фермерская гаспадарка ў Брэсцкай вобласці займалася вытворчасцю сельскагаспадарчай прадукцыі, а таксама вырошчвала і рэалізоўвала цыбуліны цюльпанаў. Фермеры прымянялі адзіны падатак для вытворцаў сельскагаспадарчай прадукцыі, які складае 1% ад валавой выручкі. Умовай прымянення такога рэжыму з’яўляецца тое, каб доля выручкі ад рэалізацыі сельскагаспадарчай прадукцыі складала не менш за 50%.
“Аднак да 2022 года выручка ад продажу цюльпанаў ужо перавышала выручку, якая атрымлівалася ад рэалізацыі сельскагаспадарчай прадукцыі. У сувязі з гэтым кіраўнік фермерскай гаспадаркі сумесна са сваім намеснікам (і адначасова ўласнікам бізнесу) зарэгістравалі падкантрольную кампанію, на якую штучна размеркавалі частку выручкі ад продажу цюльпанаў. Фармальным кіраўніком створанай фірмы быў вызначаны кіроўца КФГ”, — гаворыцца ў паведамленні КДК.
У дзяржкантролі палічылі гэта парушэннем. Паводле версіі КДК, з-за размеркавання выручкі і заніжэння падатковай базы гаспадаркі ў 2022–2025 гадах не былі выплачаны падаткі на суму больш за 1,3 млн рублёў.
Таксама ў КДК заяўляюць, што раскрылі факты ўтойвання выручкі.
“Прадукцыя рэалізоўвалася за наяўны разлік, пры гэтым ва ўлік КФГ уносіліся заніжаныя больш чым у 20 разоў сумы. У ходзе вывучэння канфіскаваных чарнавых запісаў КФГ устаноўлена, што толькі за апошнія 2 гады ад падаткаабкладання ўтоена звыш 10 млн рублёў”, — дадалі ў КДК.
Акрамя таго, дзяржкантроль выявіў, што ўласнікі бізнесу прадставілі фіктыўныя дакументы для вяртання ПДВ на суму больш за 950 тыс. рублёў.
“Для вяртання з бюджэту сум ПДВ (больш за 950 тыс. рублёў) уласнікі бізнесу прадставілі ў падатковыя органы фіктыўныя дакументы пра нібыта набыццё па заніжанай вартасці падкантрольнай кампаніяй цюльпанаў у КФГ з наступнай іх рэалізацыяй пакупнікам Расійскай Федэрацыі (падкантрольная кампанія фактычна не ўдзельнічала ва ўказаных здзелках), а таксама занізілі колькасць і вартасць цыбулін цюльпанаў, рэалізаваных КФГ у адрас фізічных асоб. Своечасовае ўмяшанне работнікаў ДФР не дазволіла ім да канца рэалізаваць задуманае”, — расказалі ў КДК.
Фігурантамі крымінальных спраў стаў уласнік бізнесу, кіраўнік гаспадаркі і кіраўнік падкантрольнай кампаніі.
Накладзены арышт на 4 кватэры і 10 аўтамабіляў, якія належаць падазраваным, таксама канфіскавана 440 тыс. еўра і 89 тыс. долараў.
Паведамляецца, што падазраваныя далі прызнальныя паказанні.