Фото: Генпрокуратура
5 сакавіка адбылося першае ў гэтым годзе пасяджэнне Камісіі па разглядзе зваротаў грамадзян Беларусі па пытаннях здзяйснення імі правапарушэнняў. Пасяджэнне прайшло пад старшынствам генпракурора Дзмітрыя Гары.
«У сваіх зваротах грамадзяне заявілі пра жаданне вярнуцца ў Беларусь, весці законапаслухмяны лад жыцця, паважаць нацыянальную сімволіку і традыцыі», — паведамляе Генпракуратура.
Колькі зваротаў разглядала камісія, не паведамляецца.
Члены камісіі прынялі рашэнне інфарміраваць заяўнікаў аб наяўнасці або адсутнасці ў дачыненні да іх узбуджаных крымінальных спраў, адміністрацыйных працэсаў або нявыкананых пастаноў аб адміністрацыйным арышце.
Нагадаем, камісія па вяртанні была створана ў пачатку лютага 2023 года ўказам Аляксандра Лукашэнкі. Яна прызвана разглядаць звароты беларусаў, якія выехалі за мяжу і баяцца вярнуцца дадому з-за рэпрэсій. Камісія таксама вызначае ўмовы вяртання грамадзян у краіну.