Хусіты ў чацвер узялі пад кантроль партовы горад Моха ў Емене. Ён знаходзіцца за 80 км ад Баб-эль-Мандэбскага праліва, які злучае Чырвонае мора і Адэнскі заліў.
Як паведамляе Reuters, хусіты таксама дасягнулі астравоў Ханіш, размешчаных каля праліва.
Прасоўванне хусітаў дазваляе ім узмацніць кантроль над важнай воднай артэрыяй і павысіць эфектыўнасць магчымых удараў па суднах, якія праходзяць праз праліў. Цяпер яны блізкія да кантролю над уваходам у праліў з боку Чырвонага мора. Далейшае прасоўванне на поўдзень у раён Дхубаба адкрые ім непасрэдны доступ да праліва.
Гэта дазволіць іранскім проксі перакрыць другі найважнейшы праліў у рэгіёне. Кантроль над ім таксама пагражае пастаўкам нафты з Саудаўскай Аравіі, якая пасля пачатку вайны ЗША супраць Ірана актыўна выкарыстоўвае свой тэрмінал у Чырвоным моры.
На гэтым фоне цана найбліжэйшага ф’ючарса на нафту маркі Brent падымалася да 109,5 долара за барэль.
