Хрэнін узнагародзіў нядбайных аграрыяў, сасланых у армію

Рэдакцыя Reform.news · 5 кастрычніка 2026, 14:57

https://reform.news/be/hrjenin-uznagarodzi-njadbajnyh-agraryja-saslanyh-u-armiju/

У Беларусі завяршыўся “збор з ваеннаабавязанымі з ліку спецыялістаў сельгаспрадпрыемстваў”. Пра гэта паведамілі ў прэс-службе Мінабароны. Улетку, падчас уборачнай кампаніі, Аляксандр Лукашэнка даручыў прызваць на зборы работнікаў сельгаспрадпрыемстваў, якія дрэнна выконваюць свае абавязкі.

“На працягу двух месяцаў больш за 170 ваеннаабавязаных на базе 103-й Віцебскай асобнай гвардзейскай паветрана-дэсантнай брыгады прайшлі інтэнсіўны курс баявой падрыхтоўкі: здалі практычныя экзамены па агнявой, тактычнай, інжынернай, медыцынскай падрыхтоўцы. Таксама ўдзельнікі збору выконвалі задачы па прыкрыцці паўднёвых рубяжоў, уключаючы фартыфікацыйнае абсталяванне мясцовасці і патруляванне”, – гаворыцца ў паведамленні Мінабароны.

Трэба адзначыць, што раней Аляксандр Лукашэнка казаў пра прызыў паўтысячы аграрыяў.

Міністр абароны Віктар Хрэнін пасля заканчэння збору звярнуўся да яго ўдзельнікаў.

«Кожны з вас, прайшоўшы падрыхтоўку, абнавіўшы свае веды і навыкі, асвоіўшы неабходныя дзеянні, несумненна, адчуў унутраную гатоўнасць у выпадку неабходнасці выконваць задачы па абароне Радзімы.

Ва ўмовах напружанай ваенна-палітычнай абстаноўкі, якая складваецца каля межаў Рэспублікі Беларусь, ад кожнага з нас залежыць бяспека нашай краіны, а значыць — нашага дома і нашай сям’і”, – сказаў ён.

Ён падкрэсліў, што ўдзельнікі збору працавалі “як адзіная каманда”.

“У ваеннай справе многае залежыць ад узгодненасці дзеянняў, дакладнага выканання загадаў і даверу адно да аднаго. Гэтыя якасці вы праявілі ў поўнай меры падчас выканання задач.

Перакананы, што атрыманы досвед спатрэбіцца вам і ў далейшым — як пры выкананні воінскіх абавязкаў, так і ў паўсядзённым жыцці, бо толькі дзякуючы адказнасці, дысцыплінаванасці і працавітасці можна дасягнуць поспеху ў любой справе. Лічу, што з усімі пастаўленымі на перыяд збораў задачамі вы справіліся», – сказаў ён.

Удзельнікам збораў таксама былі ўручаныя ўзнагароды.