Фото: ЕАБР
Еўразійскі банк развіцця палепшыў прагноз росту беларускай эканомікі, звязаўшы гэта з павелічэннем тэмпаў інвестыцый.
Па выніках першага паўгоддзя інвестыцыі ў асноўны капітал выраслі ў Беларусі на 4,1%. Для параўнання, у студзені — маі іх прырост складаў 1,5%.
«Важную ролю працягвае адыгрываць дзяржаўная падтрымка інвестыцыйнай актыўнасці. Інвестыцыі, прафінансаваныя з бюджэту, выраслі на 11,4% у гадавым выражэнні, а ўкладанні за кошт ільготных крэдытаў павялічыліся амаль у 2 разы», — гаворыцца ў штотыднёвым аглядзе эканомік краін — удзельніц ЕАБР.
«З улікам пашырэння інвестыцыйнай актыўнасці прагназуем рост ВУП Беларусі вышэй за 1,5% у 2026 годзе», — дадалі ў банку.
Нагадаем, у сярэдзіне чэрвеня ЕАБР прадставіў летні рэліз свайго макрапрагнозу, у ім прырост беларускага ВУП па выніках гэтага года ацэньваўся ў 1,3%.