Дейвидас Матуленис. Фото: flickr.com/photos/internationaltransportforum/
Галоўны саветнік прэзідэнта Літвы Дэйвідас Матулёніс заявіў, што Вільнюс прымусова ўцягваюць у дыялог з Мінскам.
Матулёніс падкрэсліў, што Літва гатова палепшыць адносіны з Беларуссю, але для гэтага Мінск павінен прадэманстраваць сістэмныя змены.
«Мы сапраўды гатовы паляпшаць гэтыя адносіны, але з боку Беларусі павінны быць сістэмныя змены — у бок дэмакратызацыі, зніжэнне падтрымкі расійскай ваеннай прамысловасці, магчыма, большая самастойнасць Беларусі», — сказаў ён LRT TELEVIZIJA.
Матулёніс лічыць, што Літву спрабуюць прымусіць пайсці на дыялог з Беларуссю і такім чынам дыпламатычна прынізіць.
«Гэта свайго роду прымусовая спроба ўцягнуць нас у дыялог і, магчыма, у пэўным сэнсе дыпламатычна прынізіць. (…) Я кажу пра пазіцыю Беларусі. (…) Тады з’явіцца падстава для Аляксандра Лукашэнкі сцвярджаць, што яны вярнуліся, нарэшце зразумелі, з кім трэба мець зносіны і г.д. Тут ёсць і пытанне самапавагі, якое таксама вельмі важнае», — заявіў саветнік літоўскага прэзідэнта.
Нагадаем, спецпасланнік прэзідэнта ЗША Джон Коўл заявіў, што спадзяецца на пачатак дыялогу паміж Вільнюсам і Мінскам на ўзроўні намеснікаў міністра замежных спраў. Таксама, на яго думку, беларускія калійныя ўгнаенні павінны праходзіць праз Літву.
Прэм’ер-міністр Літвы Інга Ругінене дапусціла магчымасць сустрэчы намеснікаў міністраў пры выкананні шэрагу ўмоў: вырашэнне праблемы з метэазондамі і нелегальнай міграцыяй, вяртанне грузавікоў у Літву без дадатковых збораў і штрафаў. Прэзідэнт Літвы Гітанас Наўседа заявіў, што кантакты з Беларуссю на пэўным узроўні магчымыя, калі беларускі рэжым праявіць добрую волю і не будзе ствараць пагроз для Літвы. МЗС Беларусі заявіла, што Мінск гатовы да дыялогу, але без папярэдніх умоў.