Дацэнт аграрнай ВНУ атрымаў 2,5 года «хіміі» за хабар у 140 рублёў ад студэнтаў

Рэдакцыя Reform.news · 6 кастрычніка 2026, 16:47

https://reform.news/be/dacjent-agrarnaj-vnu-atryma-2-5-goda-himii-za-habar-u-140-rubljo-ad-studjenta/

Дацэнт аграрнай ВНУ ў Магілёўскай вобласці атрымаў 2,5 года «хіміі» за хабар ад студэнтаў-завочнікаў. Прысуд вынес суд Горацкага раёна. Верагодна, гаворка ідзе пра выкладчыка Беларускай сельскагаспадарчай акадэміі ў Горках.

Як паведамляе пракуратура, у маі 2026 года абвінавачаны прымаў у студэнтаў-завочнікаў экзамены і абяцаў дзвюм студэнткам паставіць здавальняючыя адзнакі за 70 рублёў з кожнай.

У дзень здачы экзамену студэнткі перадалі дацэнту свае залікоўкі з укладзенымі ў іх купюрамі на агульную суму 140 рублёў. Дзяўчаты атрымалі адзнакі, але экзамен фактычна не здавалі.

На судзе выкладчык прызнаў віну і раскаяўся. Яго прыгаварылі да 2,5 года абмежавання волі з накіраваннем у папраўчую ўстанову адкрытага тыпу. Таксама ён павінен выплаціць 13 500 рублёў штрафу. На працягу пяці гадоў мужчына не зможа займаць пасады, звязаныя з выкладчыцкай дзейнасцю і выкананнем юрыдычна значных дзеянняў.