Цэментныя заводы пачнуць вяртаць бюджэту даўгі ў 2026 годзе

Цэментныя заводы пачнуць вяртаць бюджэту даўгі ў 2026 годзе. Пры гэтым іх абавязацельствы пераводзяцца ў беларускія рублі. Сёння на Нацыянальным прававым інтэрнэт-партале апублікаваны ўказ №156 ад 7 мая, які ўступіў у сілу з дня падпісання. Дакументам уносяцца змены ва ўказ аб рэструктурызацыі запазычанасці цэментных заводаў, прыняты ў 2019 годзе.

У адпаведнасці з указам абавязацельствы ААТ «Беларускі цэментны завод», ААТ «Краснасельскбудматэрыялы» і ААТ «Крычаўцэментнашыфер» перад бюджэтам па выплаце асноўнай сумы доўгу, працэнтаў, камісій і іншых плацяжоў, зробленых з рэспубліканскага бюджэту ў 2015-2024 гадах, пераводзяцца з валюты ў беларускія рублі па курсе Нацбанка на 5 мая 2026 года.

ААТ «Беларускі цэментны завод» будзе пагашаць доўг у 203,72 млн долараў у 2026-2038 гадах, ААТ «Крычаўцэментнашыфер» павінна будзе пагасіць даўгі ў 241,37 млн долараў у 2026-2049 гадах, а ААТ «Краснасельскбудматэрыялы» вярнуць у бюджэт 166,23 млн долараў у 2026-2037 гадах. Раней паводле ўказа 2019 года ААТ «Беларускі цэментны завод» павінна было пачаць выплачваць запазычанасць у 2029 годзе, а ААТ «Краснасельскбудматэрыялы» — у 2030 годзе, а ААТ «Крычаўцэментнашыфер» — толькі ў 2038 годзе.

Дадаткова ААТ «Крычаўцэментнашыфер» таксама будзе ў 2026-2038 гадах кампенсаваць плацяжы з рэспубліканскага бюджэту, зробленыя ў 2019-2026 гадах па гарантыях урада, на суму больш за 150 млн долараў. Пры гэтым абавязацельствы, якія ўзніклі пасля 5 мая гэтага года, давядзецца выконваць у рублях па бягучым курсе.

Заводы павінны будуць кампенсаваць запазычанасць штогод да 31 жніўня года, наступнага за справаздачным, у памеры, які вызначаецца Саўмінам, аднак плацяжы не могуць быць ніжэйшыя:

• 2,5% выручкі ад рэалізацыі без уліку ПДВ за 2025-2029 гады,
• 5% выручкі ад рэалізацыі без уліку ПДВ за 2030-2033 гады,
• 5% выручкі ад рэалізацыі без уліку ПДВ за 2034 і наступныя гады.

Заводы таксама павінны будуць адкрыць у «Беларусбанку» спецыяльныя рахункі для акумулявання сродкаў, прызначаных для кампенсацыі запазычанасці перад бюджэтам.

Персанальная адказнасць ускладзеная на кіраўнікоў заводаў, а таксама кіраўніцтва дзяржпрадпрыемства «Кіраўнічая кампанія холдынга «БЦК», міністра будаўніцтва і архітэктуры, профільнага віцэ-прэм’ера.