Фото: МЗКТ
Ініцыятыва былых сілавікоў BELPOL апублікавала расследаванне, прысвечанае схемам разлікаў наяўнымі пры пастаўках прадукцыі МЗКТ, які знаходзіцца пад санкцыямі. Гаворка ідзе пра супрацоўніцтва з ААЭ.
МЗКТ пастаўляе Міністэрству абароны Аб’яднаных Арабскіх Эміратаў цягачы для перавозкі танкаў, запасныя часткі і аказвае паслугі па навучанні ваенных спецыялістаў.
Кантракт выконваецца праз пасярэдніка Al Badie Trading Establishment. Паводле інфармацыі BELPOL, прадстаўнік МЗКТ прыязджае ў ААЭ і атрымлівае грошы наяўнымі ад заказчыка. Далей сродкі перадаюцца ў Генконсульства Беларусі ў Дубаі, дзе іх афармляюць як дыпламатычны груз, і ўжо ў такой якасці грошы перавозяць у краіну. Як правіла, за грашыма ездзіць намесніца гендырэктара па камерцыйных пытаннях Кацярына Сташук.
BELPOL прадэманстраваў дзве даверанасці на яе за подпісам дырэктара МЗКТ, якія дазваляюць прымаць наяўныя грошы і падпісваць акты прыёму-перадачы работ. Расследавальнікі паказалі заданне на камандзіроўку, дзе сярод мэтаў указана “забор валютнай выручкі адзіным даступным у бягучых умовах спосабам”, а таксама “афармленне і перадача ў устаноўленым парадку дыпламатычнага грузу”.
Другая схема працуе яшчэ прасцей. Пакупніка просяць прывезці грошы ў Беларусь. Сродкі перавозяцца ў чамадане. Іх перадача адбываецца ў VIP-зоне аэрапорта. Далей грошы суправаджаюцца да банка.
У BELPOL сцвярджаюць, што грошы перадаюцца без належнай праверкі, частка банкнот аказваецца пашкоджанай, бруднай або не прымаецца банкамі. Паказана ліст-запрашэнне эмірацкай кампаніі з прапановай прывезці ў Мінск сродкі па кантракце. Таксама сілавікі прадэманстравалі дакументы, якія пацвярджаюць, што банк у Беларусі не прыняў па адной аперацыі 2000 долараў, а таксама ўзяў 858 долараў камісіі.