Беларусы, якія пражываюць за мяжой, будуць абавязаныя здаваць адбіткі пальцаў

Сёння на Нацыянальным прававым інтэрнэт-партале апублікаваны закон № 130-З ад 2 лютага «Аб змяненні законаў па пытаннях дзяржаўнай дактыласкапічнай рэгістрацыі».

Дакументам уводзіцца абавязковая дактыласкапічная рэгістрацыя для замежных грамадзян і асоб без грамадзянства, якія праходзяць памежны кантроль пры перасячэнні дзяржаўнай мяжы, а таксама тых, хто падлягае дэпартацыі, высылцы з Беларусі або перадачы замежнай дзяржаве ў адпаведнасці з міжнародным дагаворам аб рэадмісіі.

Разам з тым ён уводзіць абавязковую дактыласкапічную рэгістрацыю для грамадзян Беларусі дзвюх катэгорый, у тым ліку пры выдачы або абмене дакументаў, якія сведчаць асобу:

• якія набылі грамадзянства (падданства) замежнай дзяржавы або атрымалі від на жыхарства ці іншы дакумент замежнай дзяржавы, што дае права на льготы і іншыя перавагі ў сувязі з палітычнымі, рэлігійнымі поглядамі або нацыянальнай прыналежнасцю, і праінфармавалі пра гэта органы ўнутраных спраў або дыпламатычныя прадстаўніцтвы ці консульскія ўстановы Рэспублікі Беларусь ва ўстаноўленым парадку;
• пастаянна пражываючыя за межамі Рэспублікі Беларусь і пастаўленыя на консульскі ўлік грамадзяне, якія аформілі выезд для пастаяннага пражывання (аформілі пастаяннае пражыванне) за межамі Рэспублікі Беларусь.

Патрабаванне аб дактыласкапічнай рэгістрацыі не распаўсюджваецца на непаўналетніх да 14 гадоў, а таксама на асоб, якія дасягнулі 75-гадовага ўзросту.

Палажэнні, якія тычацца грамадзян Беларусі, уступяць у сілу з 1 ліпеня 2027 года.