Контейнерный поезд из Беларуси в Китай. Фото: rw.by
Знешні гандаль Беларусі таварамі і паслугамі ў студзені быў прафіцытны. Экспарт тавараў і паслуг перавысіў імпарт, сведчаць дадзеныя Нацыянальнага банка.
Беларускі экспарт тавараў і паслуг у студзені вырас на 14,8% да 3,96 млрд долараў. Імпарт тавараў і паслуг пры гэтым павялічыўся на 3,5% да 3,8 млрд долараў. Прафіцыт знешняга гандлю склаў 153,7 млн долараў. Мінулы год пачынаўся з знешнегандлёвага дэфіцыту ў памеры 228,3 млн долараў.
Гандаль таварамі па-ранейшаму застаецца дэфіцытным. Экспарт тавараў у студзені вырас на 10% да 2,96 млрд долараў. Імпарт павялічыўся на 2,1% да 3,19 млрд долараў. Дэфіцыт гандлю таварамі склаў 231,8 млн долараў, што на 46,8% менш, чым за першы месяц мінулага года.
Экспарт паслуг у студзені вырас на 31,7% да 1 млрд долараў. Імпарт павялічыўся на 11,5% да 616,5 млн долараў. Прафіцыт гандлю паслугамі вырас за год на 85,6% да 385,5 млн долараў. Яго аказалася дастаткова, каб кампенсаваць перавышэнне імпарту над экспартам у гандлі таварамі.