Беларускі БПЛА «Міратворац» засвяціўся на парадзе ў Бенгазі. Такое ўзбраенне забаронена прадаваць ва Усходнюю Лівію
Рэдакцыя Reform.news · 17 кастрычніка 2026, 19:56
https://reform.news/be/belaruski-bpla-miratvorac-zasvjaci-sja-na-paradze-bengazi-takoe-zbraenne-zabaronena-pradavac-va-ushodnjuju-liviju/16 кастрычніка 2026 года ў Бенгазі (Усходняя Лівія) адбыўся парад штурмавых і парашутна-дэсантных падраздзяленняў сіл спецыяльнага прызначэння. Фотасправаздачу апублікавала прэс-служба камандавання Лівійскай нацыянальнай арміі (ЛНА). Сярод прадстаўленай зброі засвяціўся і беларускі БПЛА «Міратворац». Раней пра пастаўкі гэтага ўзбраення ва Усходнюю Лівію не паведамлялася.
Нагадаем, пастаўка ўдарных беспілотнікаў у Лівію без папярэдняга адабрэння санкцыйнага камітэта Савета Бяспекі ААН з’яўляецца парушэннем зброевага эмбарга ў дачыненні да гэтай краіны. Яно было ўведзена 26 лютага 2011 года рэзалюцыяй Савета Бяспекі ААН №1970.
Што такое БПЛА «Міратворац»?
Прадукцыя КБ «INDELA» КБ, якое ў 2017 годзе было перайменавана ў КБ «Беспілотныя Вертолёты» (брэнд «UAVHELI»), не ўпершыню трапляе ў скандал.
Першапачаткова яны распрацоўвалі беспілотнік «Беркут-БМ» — нібыта рабатызаваную паветраную мішэнь, з размахам крыла 2,8 м, масай 33 кг, турбарэактыўным рухавіком, парашутнай сістэмай выратавання і хуткасцю 450 км/г.
“Мішэнь” пазней трансфармавалася ў БПЛА «Міратворац» — беспілотны самалёт-камікадзэ з турбарэактыўным рухавіком, размахам 2,8 м, далёкасцю 180 км, баявой часткай 10 кг. Доследныя ўзоры былі выраблены ў 2021 годзе. У цяперашні час запушчаны ў серыйную вытворчасць.
Вядома, што беларускі беспілотнік аснашчаны кампактнымі мікратурбарэактыўнымі рухавікамі кітайскай вытворчасці кампаніі «Swiwin».
На MILEX–2023 быў прадстаўлены перспектыўны мабільны комплекс супрацьдзеяння БПЛА «Міратворац-П».
Куды траплялі БПЛА «Міратворац»/«Беркут-БМ»
У лютым 2025 года Reform.news паведамляў, што паўстанцы з групоўкі М23 у аэрапорце Гомы (найбуйнейшы горад на ўсходзе ДРК) захапілі партыю ваеннай тэхнікі, у тым ліку упакаваныя ў драўляныя скрыні новыя БПЛА «Беркут-БМ».
У чэрвені 2026 года індыйская кампанія SMPP паведаміла пра завяршэнне пастаўкі 100 рэактыўных ударных дронаў-камікадзэ Peacekeeper (Agniveg) і шасці навучальных комплексаў для індыйскай арміі. Гаворка ішла пра беларускія БПЛА. Кантракт быў падпісаны ў 2025 годзе з «Белспецзнештэхнікай».
Выданне Afghanistan International сцвярджала, што Індыя закупляе ў Беларусі ўзбраенне для Талібана.
Беларуская дэлегацыя
На парадзе 16 кастрычніка 2026 года прысутнічалі камандуючы Лівійскімі арабскімі ўзброенымі сіламі Халіфа Хафтар і яго сын і намеснік Садам Хафтар.
Мерапрыемства правялі на тэрыторыі школы штурмавой і парашутна-дэсантнай падрыхтоўкі. Яго прымеркавалі да дванаццатай гадавіны ўступлення сіл Хафтара ў Бенгазі 15 кастрычніка 2014 года.
Паводле даных прэс-службы, на парадзе таксама прысутнічалі кіраўнік урада на ўсходзе Лівіі Усама Хамад, ваеннае камандаванне, афіцыйныя дэлегацыі «дружалюбных дзяржаў» і сем’і загінулых вайскоўцаў.
Мяркуючы па фота, там прысутнічалі і прадстаўнікі Беларусі: генерал-маёр запасу Сяргей Дудко і капітан Праценка А. А.
Сяргей Рыгоравіч Дудко — адстаўнік, удзельнік вайны ў Афганістане. Узначальваў упраўленне сіл спецыяльных аперацый Генштаба, затым займаў пасаду начальніка ўпраўлення тэрытарыяльнай абароны — намесніка начальніка Генеральнага штаба УС Беларусі. Пазней працаваў намеснікам кіраўніка Антытэрарыстычнага цэнтра СНД і ў 2021 годзе ўзначаліў Беларускую федэрацыю стралковага спорту.
Цікаўны персанаж – капітан Праценка. Reform.news высветліў, што маладога чалавека завуць Антон і яго многае звязвае з Лівіяй.
Яго сям’і галоўная газета краіны “СБ. Беларусь сегодня” ў 2018 годзе прысвяціла цэлы матэрыял. Аказваецца, прадзед, дзед і бацька Антона таксама былі звязаныя з арміяй.
Хлопчык нарадзіўся ў Мінску, але да 9-га класа жыў з бацькамі ў Лівіі. Затым вучыўся ў Мінскім гарадскім кадэцкім вучылішчы № 2, а ў 2017-м паступіў на спецыяльнасць «Кіраванне танкавымі падраздзяленнямі» на агульнавайсковым факультэце Ваеннай акадэміі Беларусі.
У артыкуле “Совбелки” пра бацьку Антона ні слова, але згадваецца дзед Аляксандр Уладзіміравіч Праценка, таксама былы танкіст. У сетцы можна знайсці згадку пра творчую сустрэчу з Аляксандрам Уладзіміравічам Праценкам – “ветэранам Узброеных Сіл і баявых дзеянняў у Лівіі, “мысляром у творчым рэчышчы”, сапраўдным афіцэрам і патрыётам”.
Сляды “сапраўднага патрыёта” ёсць і ў базе даносаў. 16 верасня 2020 года падчас пратэстаў Аляксандр Уладзіміравіч настукаў у міліцыю на дзвюх жанчын, якія “гучна слухаюць музыку, размахваюць БЧБ сцягам”.
Чым займаўся бацька Антона ў Лівіі – устанавіць не ўдалося. Яго поўны цёзка Праценка А.А. быў камандзірам Ту-22К і Ту-22П у Мачулішчах да іх вываду ў 1994 годзе ў Расію.
Пасля вучобы ў Акадэміі Антон звязваць свой лёс з танкам не стаў, а пайшоў у Дэпартамент міжнароднага ваеннага супрацоўніцтва Міністэрства абароны. У рэпартажы ведамаснай газеты “Во славу Родины” ён ёсць на агульным фота супрацоўнікаў.
На фотаздымках з парада ва Усходняй Лівіі на плячы Антона Праценкі шаўрон «Упраўленне адміністрацыйна-гаспадарчага забеспячэння цэнтральных органаў ваеннага кіравання».
