Беларусь уводзіць электронныя візы для грамадзян Індыі, а таксама плануе адкрыць прамыя авіярэйсы з Мінска ў Мумбаі і Гоа.
Новая рэдакцыя візавых правілаў была прынятая ўрадам Беларусі па ініцыятыве МЗС 14 верасня 2026 года. У абноўленых правілах Індыя дададзеная ў пералік краін, грамадзяне якіх маюць права атрымаць e-visa для ўезду ў Беларусь, паведамляе МЗС.
«Гэта рашэнне накіравана на сістэмнае спрашчэнне парадку ўезду і інтэнсіфікацыю міжасобасных кантактаў (people-to-people), якія складаюць аснову беларуска-індыйскіх адносін. Укараненне e-visa для індыйскіх грамадзян стане практычным крокам па актывізацыі дзелавога супрацоўніцтва», — лічаць у МЗС.
Беларусь чакае, што ўвядзенне электронных віз знізіць адміністрацыйныя бар’еры, спросціць арганізацыю ўзаемных дзелавых візітаў, B2B-перамоў і працу над сумеснымі інвестыцыйнымі і гандлёвымі праектамі.
У дадатак да візавых спрашчэнняў Беларусь плануе запусціць прамыя авіярэйсы з Мінска ў Мумбаі і Гоа.
