Азотны камбінат з «Газпрамам». У Лукашэнкі з’явілася новая ідэя для Трампа

Рэдакцыя Reform.news · 29 верасня 2026, 12:37

https://reform.news/be/azotny-kambinat-z-gazpramam-u-lukashjenki-z-javilasja-novaja-idjeja-dlja-trampa/

Аляксандр Лукашэнка на сустрэчы з губернатарам расійскай Ульянаўскай вобласці Аляксеем Рускіх выказаў ідэю новай «камерцыйнай прапановы» для прэзідэнта ЗША Дональда Трампа. На гэты раз у «схему» ўцягнуты прэзідэнт Расіі Уладзімір Пуцін.

«З Уладзімірам Уладзіміравічам (Пуціным — заўв. Reform.news) дамовіліся, што «Газпрам» падключыцца ў нас да рэалізацыі праекта па будаўніцтве азотнага камбіната. Трэба амерыканцам прапанаваць. Яны хочуць угнаенні — азотныя ў тым ліку — калі ласка, давайце разам пабудуем. Па вашай тэхналогіі. Вы (ЗША — заўв. Reform.news), «Газпрам» і Беларусь. У нас ужо пляцоўка падабраная, усе сеткі існуюць. Не — будзем з «Газпрамам», расіянамі будаваць і гатовую прадукцыю прадаваць», — сказаў Лукашэнка, перадае яго прэс-служба.

На мінулым тыдні прэзідэнт ЗША Дональд Трамп напісаў допіс пра падрыхтоўку вялікай здзелкі з Беларуссю па пастаўках калію.

Трэба адзначыць, што раней Лукашэнка гаварыў пра прапанову амерыканцам набыць за 3 млрд долараў ААТ «Недра Нежын», якое распрацоўвае Нежынскі ўчастак Старобінскага радовішча калійных соляў. Яго праектная магутнасць — 2 млн т калійных угнаенняў за год.

Аляксандр Лукашэнка ўжо не першы раз у апошнія гады прапануе «скеміць на траіх» буйны праект у сферы вытворчасці ўгнаенняў. Раней ён рабіў такую прапанову Алжыру і Аману, першы павінен забяспечыць фосфарныя ўгнаенні, другі — азотныя, а Беларусь — калійны складнік.

У пачатку верасня прапанова аб вытворчасці комплексных угнаенняў прагучала на сустрэчы з кіраўніком урада Тога Форам Эсазімнай Гнасінгбэ. Кіраўнік тагалезскага ўрада нагадаў, што раней яго краіну наведаў з афіцыйным візітам міністр замежных спраў Беларусі Максім Рыжанкоў. Тагалезскі бок падкрэсліў, што здабывае шмат фосфару. Лукашэнка тады паабяцаў, што беларускі бок прадставіць свае інвестыцыйныя прапановы па вытворчасці комплексных угнаенняў падчас будучага візіту кіраўніка МЗС Тога.

Сёння падчас сустрэчы з Рускіх Лукашэнка таксама запэўніваў расійскага губернатара ў тым, што шматвектарнасць не аддаляе Беларусь ад Расіі.