Агенцтва AFP паведаміла ў нядзелю, што прэзідэнт Францыі Эманюэль Макрон заклікаў Аляксандра Лукашэнку не дапусціць уцягвання Беларусі ў расійскую вайну супраць Украіны. Паведамляючы пра размову, AFP спаслалася на супрацоўніка прэзідэнта Францыі.
Паводле слоў гэтай крыніцы, Макрон «падкрэсліў рызыку для Беларусі ў выпадку, калі яна дазволіць уцягнуць сябе ў агрэсіўную вайну», якую Расія вядзе супраць Украіны. Прэзідэнт Францыі «таксама заклікаў Аляксандра Лукашэнку зрабіць неабходныя крокі для паляпшэння адносін паміж Беларуссю і Еўропай», — дадаў суразмоўца AFP.
Нагадаем, сёння адбылася тэлефонная размова прэзідэнта Францыі Эманюэля Макрона з Аляксандрам Лукашэнкам. Гутарка прайшла па ініцыятыве французскага боку.
Бакі абмеркавалі «рэгіянальныя праблемы і ўзаемаадносіны Беларусі з ЕС і Францыяй у прыватнасці», паведаміла прэс-служба Лукашэнкі.
