Аўтахламам у Беларусі будуць лічыцца няспраўныя аўтамабілі, пакінутыя па-за стаянкамі

Рэдакцыя Reform.news · 10 жніўня 2026, 18:06

https://reform.news/be/a-tahlamam-u-belarusi-buduc-lichycca-njaspra-nyja-a-tamabili-pakinutyja-pa-za-stajankami/

10 жніўня Аляксандр Лукашэнка падпісаў указ, які ўносіць змены ва ўказ 2011 года аб утылізацыі аўтахламу.

«Дакумент накіраваны на скарачэнне праблемных пытанняў, звязаных з безгаспадарным транспартам, спрашчэнне працы выканкамаў і ўпаўнаважаных імі арганізацый у гэтым напрамку», – паведамляе прэс-служба Лукашэнкі.

Згодна з указам, да аўтахламу будуць адносіцца няспраўныя самаходныя машыны (трактары і аналагічная тэхніка), пакінутыя па-за прыдамавымі ўчасткамі прыватных дамоў і стаянкамі.

Права на працу з кінутым транспартам атрымліваюць арганізацыі, упаўнаважаныя ва ўстаноўленым парадку выканкамамі. Разам з выканкамамі яны змогуць атрымліваць звесткі пра асоб, якія раней мелі непасрэднае дачыненне да кінутай тэхнікі (ажыццяўлялі яе страхаванне, тэхагляд, выплату штрафаў) і маглі з’яўляцца яе ўласнікамі. Такім асобам будуць высылацца паведамленні.

Скарочаны тэрмін падачы ў суд заявы аб прызнанні транспартнага сродку безгаспадарным і перадачы яго ва ўласнасць адпаведнай адміністрацыйна-тэрытарыяльнай адзінкі. Ён складзе 10 дзён, а не 30, як было раней.