Федэрацыя хакея Беларусі мае намер аспрэчыць нядопуск зборных да чэмпіянатаў свету 2027 года

Рэдакцыя Reform.news · 7 лістапада 2026, 17:24

https://reform.news/be/fedjeracyja-hakeja-belarusi-mae-namer-asprjechyc-njadopusk-zbornyh-da-chjempijanata-svetu-2027-goda/

Федэрацыя хакея Беларусі (ФХБ) не згодная з рашэннем Міжнароднай федэрацыі хакея (IIHF) аб нядопуску беларускіх зборных да чэмпіянатаў свету 2027 года і разглядае магчымасць звароту ў Спартыўны арбітражны суд (CAS). Пра гэта гаворыцца ў заяве ФХБ, апублікаванай на сайце арганізацыі.

Нагадаем, 7 лістапада Рада IIHF абвясціла, што моладзевая і асноўная мужчынская зборныя Беларусі не змогуць узяць удзел у чэмпіянатах свету 2027 года. У IIHF патлумачылі, што пры разглядзе пытання ўлічваліся ўжо зацверджаныя арганізацыйныя і спартыўныя ўмовы правядзення абодвух чэмпіянатаў. У прыватнасці, структура турніраў, расклад матчаў, продаж білетаў і аперацыйнае планаванне.

У ФХБ адзначылі, што рашэнне прынята праз некалькі дзён пасля таго, як Дысцыплінарная калегія IIHF часткова задаволіла апеляцыю беларускага боку на рашэнні Рады ад 27 ліпеня 2026 года.

“Рашэнне прынята праз некалькі дзён пасля таго, як Дысцыплінарная калегія IIHF, задаволіўшы апеляцыю ФХБ, анулявала рашэнні Рады ад 27 ліпеня 2026 года і прызнала, што спасылкі на меркаванні бяспекі не падмацаваны дастатковымі доказамі. Гэта ўжо другі выпадак у 2026 годзе, калі Дысцыплінарная калегія адмяняе рашэнні Рады IIHF аб абмежаванні ўдзелу нацыянальных каманд”, – заявілі ў федэрацыі.

ФХБ лічыць, што да чэмпіянату свету ў Германіі, які пачнецца ў маі 2027 года, застаецца дастаткова часу для вырашэння ўсіх арганізацыйных пытанняў.

«Рашэнне, па сутнасці, узнаўляе вынік адмененага: зборныя Беларусі зноў застаюцца па-за турнірамі, пры гэтым змяняецца толькі абгрунтаванне. Выклікае пытанні і непаслядоўнасць падыходаў. Нядопуск беларускіх каманд IIHF тлумачыць неабходнасцю захаваць структуру і арганізацыйнае планаванне турніраў, але ў дачыненні да Расіі заяўляе пра неабходнасць выканаць рашэнне CAS, што таксама запатрабуе змянення складу ўдзельнікаў. Чаму такі ж падыход не ўжыты да Беларусі, застаецца без адказу», – заявіў старшыня ФХБ Аляксандр Багдановіч.

Федэрацыя хакея Беларусі заявіла, што мае намер “абараняць правы беларускага хакея” і ў найбліжэйшы час вызначыць далейшыя юрыдычныя дзеянні, уключаючы магчымасць абскарджання рашэнняў органаў IIHF у Спартыўным арбітражным судзе.