Сібіга заклікаў запрашаць Ціханоўскую і дэмсілы на мерапрыемствы Цэнтральна-Еўрапейскай ініцыятывы

Рэдакцыя Reform.news · 6 лістапада 2026, 17:23

https://reform.news/be/sibiga-zaklika-zaprashac-cihano-skuju-i-djemsily-na-merapryemstvy-cjentralna-e-rapejskaj-inicyjatyvy/

Міністр замежных спраў Украіны Андрэй Сібіга заклікаў запрашаць беларускія дэмакратычныя сілы на мерапрыемствы Цэнтральна-Еўрапейскай ініцыятывы (ЦЕІ). Пра гэта ён заявіў 5 лістапада на ўрачыстай цырымоніі перадачы старшынства ў ЦЕІ ад Румыніі Украіне, паведамляе ўкраінскі МЗС.

«Я перакананы, што ў гэтай арганізацыі знойдзецца месца для свабоднай і дэмакратычнай Беларусі. Я прапаную запрашаць прадстаўнікоў беларускіх дэмакратычных сіл і іх лідара Святлану Ціханоўскую ў якасці спецыяльных гасцей на нашы мерапрыемствы — як сімвал надзеі і будучыні для беларускага народа», — заявіў Сібіга.

Паводле слоў Сібігі, старшынства Украіны ў ЦЕІ будзе сканцэнтравана на еўрапейскай бяспецы і спыненні расійскай агрэсіі супраць Украіны, а таксама на садзейнічанні пашырэнню Еўрасаюза, развіцці рэгіянальнага супрацоўніцтва, энергетычнай бяспекі, інфраструктуры, узмацненні супрацоўніцтва ў сферы кібербяспекі і супрацьдзеянні дэзінфармацыі.

Цэнтральна-Еўрапейская ініцыятыва (ЦЕІ) — рэгіянальная міжурадавая арганізацыя, створаная ў 1989 годзе для развіцця палітычнага, эканамічнага і культурнага супрацоўніцтва паміж краінамі Цэнтральнай, Усходняй і Паўднёва-Усходняй Еўропы. Удзел Беларусі ў ЦЕІ быў прыпынены ў 2022 годзе.