Беларускія і расійскія сілавікі ліквідавалі Telegram-пляцоўку Continental Service

Рэдакцыя Reform.news · 29 кастрычніка 2026, 09:13

https://reform.news/be/belaruskija-i-rasijskija-silaviki-likvidavali-telegram-pljaco-ku-continental-service/

Беларускія і расійскія сілавікі ліквідавалі Telegram-пляцоўку Continental Service, якая аказвала паслугі для кібермахляроў і іншых зламыснікаў.

“Следчы камітэт Рэспублікі Беларусь сумесна з галоўным упраўленнем па супрацьдзеянні кіберзлачыннасці МУС рэспублікі і расійскімі праваахоўнымі органамі ўстанавілі факты злачыннай дзейнасці ўдзельнікаў Continental Service, якая ажыццяўлялася праз інтэрнэт. Устаноўлены асобы шэрагу людзей, якія забяспечвалі дзейнасць гэтага інтэрнэт-сэрвісу, некаторыя з іх затрыманыя. Аператыўна-вышуковыя мерапрыемствы працягваюцца”, – прыводзіць ТАСС словы прадстаўніка сілавікоў.

Паводле яго слоў, былі атрыманыя лічбавыя ідэнтыфікатары (ID) Telegram, звесткі пра нумары тэлефонаў, банкаўскія рэквізіты, віртуальныя кашалькі і IP-адрасы. Удзельнікі Continental Service працавалі з Масквы. Яны арандавалі офіс непадалёк ад Беларускага вакзала. Пасля таго, як на іх звярнулі ўвагу расійскія сілавікі, яны паспрабавалі схавацца ў Беларусі. Аднак на тэрыторыі нашай краіны іх затрымалі.

МУС Беларусі і іншыя сілавыя органы пакуль не паведамлялі пра аперацыю.

Continental Service працавала з 2021 года. Праз гэты сэрвіс вербавалі людзей для злачыннай дзейнасці, займаліся махлярствам, незаконна збіралі асабістыя звесткі пра людзей, прадавалі базы даных для масавых абтэлефаноўванняў, паслугі па “прабіве”, прадавалі банкаўскія карты і прапаноўвалі схемы вываду грошай.

27 кастрычніка стала вядома, што пляцоўка Continental Service у даркнэце была ліквідаваная. Раніцай гэтага дня ў яе канале быў апублікаваны пост ад імя сілавікоў.