Трамп зноў заявіў пра блізкасць пагаднення паміж РФ і Украінай

Рэдакцыя Reform.news · 22 кастрычніка 2026, 07:56

https://reform.news/be/tramp-zno-zajavi-pra-blizkasc-pagadnennja-pamizh-rf-i-ukrainaj/

Прэзідэнт ЗША Дональд Трамп у чарговы раз заявіў, што мір паміж Расіяй і Украінай бліжэй, чым калі-небудзь. Таму ён і адклаў “пякельныя” санкцыі, прадугледжаныя законам Грэма.

“Нядаўна я размаўляў з прэзідэнтам Пуціным пра завяршэнне яго вайны з Украінай. Думаю, мы набліжаемся да гэтага. Магчыма, цяпер мы бліжэй, чым калі-небудзь раней”, – сказаў Трамп.

Яго словы прагучалі пасля місіі Стыва Уіткафа, які ў аўторак і сераду сустрэўся спачатку з прэзідэнтам Украіны Уладзімірам Зяленскім, а затым з прэзідэнтам РФ Уладзімірам Пуціным.

“Мы, магчыма, блізкія да пагаднення ўпершыню за доўгі час. А калі вы блізкія да пагаднення і вядзяце вельмі далікатныя перамовы, то не ўводзіце новыя санкцыі”, – дадаў Трамп.

Уіткаф учора, вяртаючыся з Расіі, зрабіў прыпынак у Осла, дзе сустрэўся з прэм’ер-міністрам Нарвегіі Ёнасам Гарам Стэрэ, які ўдзельнічаў у перамовах з украінскім бокам у аўторак. Пасля размовы з Уіткафам Стэрэ выказаў меркаванне, што “магчыма, цяпер мы ўступілі ў фазу, калі расіяне таксама шукаюць магчымасці для дыпламатыі”. Паводле яго слоў, таксама дасягнута дамоўленасць пра новую трохбаковую сустрэчу паміж ЗША, РФ і Украінай.

Прэзідэнт Украіны Уладзімір Зяленскі ўчора ўвечары пацвердзіў, што атрымаў інфармацыю пра трохбаковы фармат.

“Мы атрымалі фідбэк, што Расія падтрымлівае трохбаковую сустрэчу на ўзроўні нашых каманд. Амерыканскі бок прапануе зрабіць гэта як мага хутчэй. Мы падтрымліваем гэта”, – сказаў Зяленскі.

Дата сустрэчы пакуль невядомая, аднак украінскі прэзідэнт разлічвае, што яна адбудзецца ў пачатку лістапада.

“Мы гаварылі з нашымі амерыканскімі партнёрамі. Зробяць, каб гэта было як мага раней, у лістападзе. Я думаю, не пазней за пачатак лістапада. Ну, паглядзім, не ўсё ад нас залежыць”, – заўважыў ён.

“Парадак дня зразумелы: скончыць вайну, наблізіць мір і падрыхтаваць усё для сустрэчы на ўзроўні лідараў. І гэта вельмі важна для ўсіх. Для нас, прынамсі, для Украіны вельмі важна. Мы заўсёды падкрэсліваем гэта”, – растлумачыў Зяленскі.

The Atlantic у сераду напісаў са спасылкай на крыніцы, што Трамп разлічвае на падпісанне пагаднення паміж Зяленскім і Пуціным падчас саміту G20, які адбудзецца ў снежні ў штаце Фларыда.