Лукашэнка незадаволены пустуючым арэндным жыллём

Рэдакцыя Reform.news · 22 верасня 2026, 12:01

https://reform.news/be/lukashjenka-nezadavoleny-pustujuchym-arjendnym-zhylljom/

Аляксандр Лукашэнка незадаволены тым, што ў краіне пустуе арэнднае жыллё, а амаль 6 тыс. незаселеных памяшканняў мясцовыя ўлады хочуць знесці. Пра гэта ён заявіў на нарадзе, прысвечанай будаўнічай галіне.

“Як мяне інфармуюць, расце колькасць пустуючых арэндных кватэр. Дзіўна, як? Цяпер у пераліку незапатрабаваных больш за 17 тыс. жылых памяшканняў. Мы пабудавалі жыллё, і яно нікому не патрэбнае? Многія кватэры прастойваюць больш за год. А дзе гаспадарскі падыход? Грошы трацім на ўтрыманне, у гэты час людзі ў чарзе стаяць”, — абурыўся Лукашэнка.

Ён дадаў, што частка раней пабудаванага арэнднага жылля не рамантуецца, прыходзіць у непрыдатнасць і яго збіраюцца зносіць.

Прэм’ер-міністр Аляксандр Турчын на гэта адказаў, што прастойвае ў асноўным жыллё, якое аднеслі да арэнднага ў 2016 годзе. Раней гэта было ведамаснае, службовае або проста не прыватызаванае грамадзянамі жыллё. Незатрабаванае ў асноўным жыллё, размешчанае ў сельскай мясцовасці.

“Па-рознаму бывае. Часам гэтыя дамы, старызну, можа, і трэба зносіць, але сёе-тое можна і адрамантаваць, давесці да ладу або прадаць”, — адрэагаваў Лукашэнка.

Яшчэ адным прадметам яго абурэння сталі разлікі за арэнднае жыллё і камунальныя паслугі. Паводле яго слоў, КДК далажыў, што пратэрмінаваная запазычанасць за арэнду і камунальныя паслугі ў цэлым па краіне перавысіла 20 млн рублёў. Пры гэтым даўжнікі працягваюць карыстацца жыллём.

“Выклікае здзіўленне цэнаўтварэнне і дысцыпліна разлікаў за арэндныя метры. У некаторых выпадках арэндная плата за жыллё ў абласных цэнтрах проста сімвалічная: 30 рублёў у месяц за двухпакаёвую кватэру.

На гэтым фоне ёсць такі парадокс: пратэрмінаваная запазычанасць за арэнду і камунальныя паслугі ў цэлым па краіне сёння пераваліла за 20 мільёнаў рублёў. Даўжнікі гадамі працягваюць карыстацца арандаванымі квадратнымі метрамі. Капейкі каштуе, і гэта заплаціць не можам.

Зафіксаваныя Камітэтам дзяржаўнага кантролю факты і сумы сукупных даўгоў паказваюць, што тут нейкая сістэмная недапрацоўка, якую трэба выправіць”, — абурыўся Лукашэнка.

Ён таксама падкрэсліў, што пабудаваныя кватэры пуставаць не павінны.

“Не так даўно, пасля скаргаў, мы прынялі рашэнне аб максімальным скарачэнні тэрмінаў засялення новабудоўляў. Мясцовым органам улады гэты працэс варта ўзяць пад кантроль. Пабудаваныя кватэры пуставаць не павінны”, — сказаў ён.

Паводле яго слоў, патрабаванні да арэнднага жылля застаюцца ранейшымі.

“Прыярытэты ранейшыя: цана метра — не вышэй за сярэднямесячную заработную плату, тэрміны ўводу — нарматыўныя. А якасць… Трэба зрабіць так, каб чалавек мог усяліцца ў дом або кватэру і жыць”, — сказаў ён.

Лукашэнка таксама адзначыў, што арэнднае жыллё часта будуецца не пад патрэбу, а дзеля выканання паказчыкаў.

“Катастрофа, не так? Пры гэтым рэгіёны часам скардзяцца, што адсутнічае не толькі неабходнасць будаўніцтва, але і крыніцы фінансавання. Людзям абяцалі будаваць кватэры ў прывязцы да працоўных месцаў. У гэтым, напэўна, сутнасць арэнднага жылля”, — сказаў ён.

Лукашэнка дадаў, што некаторыя прадпрыемствы пачалі будаваць кватэры для сваіх работнікаў, але такіх прыкладаў пакуль няшмат.

“Некаторыя прадпрыемствы пачалі будаваць для сваіх работнікаў асобныя кватэры. Але іх таксама мала: 153 — у 2025 годзе. Што нам трэба вырашыць, каб гэтая практыка стала больш масавай?” — спытаў ён.

Нарэшце, Лукашэнка таксама канстатаваў зніжэнне аб’ёмаў будаўніцтва жылля ў цэлым.

«Акрамя арэнднага ў краіне працягваецца будаўніцтва жылля з дзяржаўнай падтрымкай, камерцыйнага і індывідуальнага жылля. Усе рашэнні, пра якія прасілі ўрад і аблвыканкамы, па гэтых пытаннях прынятыя. Як мне дакладваюць, тэмпы ўводу жылля ў першым паўгоддзі 2026 года знізіліся. Чым гэта можам растлумачыць?

У сродках масавай інфармацыі і сацыяльных сетках часам з’яўляюцца скаргі грамадзян на некампетэнтнасць мясцовых улад, бюракратычныя правалочкі банкаў пры выдачы жыллёвых крэдытаў і таму падобнае. Такіх сітуацый быць не павінна! І тут урад павінен на ўсю катушку ўключыцца”, — пацікавіўся ён.