У Офісе Ціханоўскай назвалі тры мэты ўдзелу ў Генасамблеі ААН

Рэдакцыя Reform.news · 21 верасня 2026, 17:51

https://reform.news/be/u-ofise-cihano-skaj-nazvali-try-mjety-dzelu-genasamblei-aan/

У Офісе Святланы Ціханоўскай назвалі тры асноўныя мэты яе ўдзелу ў 81-й сесіі Генеральнай Асамблеі ААН у Нью-Ёрку. Сярод іх — правядзенне мерапрыемства высокага ўзроўню з удзелам міністраў замежных спраў па Беларусі, усталяванне кантактаў з новымі палітыкамі і прадстаўнікамі іншых краін, а таксама «кулуарная дыпламатыя».

Адна з асноўных тэм, якую мае намер прасоўваць каманда лідаркі дэмсіл, — Беларусь у кантэксце рэгіянальнай і сусветнай бяспекі. У Офісе Ціханоўскай лічаць важным, каб пры абмеркаванні магчымых шляхоў завяршэння вайны ва Украіне Беларусь таксама заставалася ў міжнародным парадку дня і разглядалася як частка пытанняў рэгіянальнай бяспекі.

«Для нас важна, каб Беларусь не стала своеасаблівым “суцяшальным прызам” і каб пры пошуку шляхоў завяршэння вайны ва Украіне беларускае пытанне таксама заставалася на парадку дня», — заявілі ў Офісе Ціханоўскай.

Якое пытанне пра Беларусь найбольш складана і важна данесці міжнародным партнёрам?

Самым важным пытаннем, якое дэлегацыя плануе данесці міжнародным партнёрам, называецца неабходнасць сур’ёзнага ўключэння Беларусі ў сістэму рэгіянальнай бяспекі.

“Каб пра Беларусь не забывалі ў больш шырокім геапалітычным кантэксце і не разглядалі беларускае пытанне выключна праз прызму гуманітарнай сітуацыі. Важна таксама гаварыць пра будучыню Беларусі, пра транзіт улады, дэмакратызацыю краіны і яе месца ў рэгіянальнай бяспецы”, — заявілі ў Офісе.