У Бараўлянах знайшлі зніклых выхаванцаў SOS-Дзіцячай вёскі

Рэдакцыя Reform.news · 20 верасня 2026, 11:36

https://reform.news/be/u-bara-ljanah-znajshli-zniklyh-vyhavanca-sos-dzicjachaj-vjoski/

У Бараўлянах завяршыліся пошукі двух выхаванцаў «SOS-Дзіцячай вёскі Бараўляны» — хлопчыкаў 12 і 10 гадоў. Дзяцей знайшлі раніцай 20 верасня каля аўтазаправачнай станцыі, паведаміла прэс-служба УУС Мінаблвыканкама.

Паводле інфармацыі міліцыі, яшчэ да сыходу хлопчыкі расказвалі аднагодкам пра свае планы. Каля 17:00 19 верасня яны з’ехалі на веласіпедах, пасля чаго пачаліся іх пошукі.

Для каардынацыі аперацыі быў разгорнуты сітуацыйны штаб. У пошуках удзельнічалі супрацоўнікі міліцыі і МНС, вайскоўцы і валанцёры. Былі задзейнічаныя службовыя сабакі, беспілотнікі і іншая тэхніка.

Каля 7:35 міліцыянер-вадзіцель аўтазака канвойнага падраздзялення ізалятара часовага ўтрымання міліцыі грамадскай бяспекі Мінскага РУУС Канстанцін Дуброва заўважыў дзяцей каля АЗС. У гэты момант яны выходзілі з ляснога масіву.

Хлопчыкаў перадалі спецыялістам. Паводле інфармацыі міліцыі, з імі ўсё добра.