Нарвегія арыштавала расійскае судна па запыце Украіны

Рэдакцыя Reform.news · 3 верасня 2026, 08:32

https://reform.news/be/narvegija-aryshtavala-rasijskae-sudna-pa-zapyce-ukrainy/

Нарвежскія ўлады арыштавалі расійскае навукова-даследчае судна “Прафесар Малчанаў” па патрабаванні ўкраінскай кампаніі “Нафтагаз”.

Судна знаходзіцца на Шпіцбергене. Яно належыць Расгідрамету і выконвае рэйсы на арктычны архіпелаг.

“Нафтагаз” паведаміў, што арышт накладзены па рашэнні мясцовага суда ў Нарвегіі ад 31 жніўня для забеспячэння выканання абавязацельстваў Расіі па арбітражным рашэнні на суму 4,22 млрд долараў.

У 2023 годзе арбітраж у Гаазе абавязаў Расію выплаціць «Нафтагазу» па спрэчцы вакол актываў. Расія тады заявіла, што не прызнае гаагскую юрысдыкцыю і не ўдзельнічала ў працэсе.

Расійскі трэст “Арктыкуголь”, у інтарэсах якога працавала арыштаванае судна, мае намер абскардзіць рашэнне нарвежскага суда.