Лукашэнка пачаў праверку УС, гэтым разам паведаміўшы Хрэніну

Рэдакцыя Reform.news · 24 жніўня 2026, 13:15

https://reform.news/be/lukashjenka-pacha-praverku-us-gjetym-razam-pavedami-shy-hrjeninu/

У Беларусі пачата праверка боегатоўнасці ў адной з артылерыйскіх брыгад. Яна праводзіцца па даручэнні Аляксандра Лукашэнкі, паведаміў дзяржсакратар Савета бяспекі Аляксандр Вальфовіч.

Паводле слоў Вальфовіча, праверкі падраздзяленняў у другім паўгоддзі праводзяцца ўжо не наўпрост, а праз Міністэрства абароны.

“У адрозненне ад праверак, якія былі ў першым паўгоддзі, дзе распараджэнні ўручаліся непасрэдна ў падраздзяленні, абмінаючы Генеральны штаб, асаблівасцю гэтай праверкі стала праверка ўсёй вертыкалі кіравання – ад міністра абароны да ніжэйстаячага падраздзялення”, – сказаў ён, перадае БелТА.

Падчас праверкі акцэнт робіцца на асаблівасці вядзення баявых дзеянняў у сучасных умовах, укараненне досведу канфліктаў ва Украіне і Іране ў сістэму падрыхтоўкі войскаў, пытанні агнявога паражэння, дэцэнтралізаванага кіравання.

У боегатоўнасць прыводзіцца адна з артылерыйскіх брыгад цэнтральнага падпарадкавання. Адпаведнае распараджэнне ўручана міністру абароны Віктару Хрэніну.