BELPOL правёў закрыты брыфінг для Міністэрства абароны Украіны

Рэдакцыя Reform.news · 2 мая 2026, 12:54

https://reform.news/be/belpol-pravjo-zakryty-bryfing-dlja-ministjerstva-abarony-ukrainy/

Прадстаўнікі арганізацыі BELPOL завяршылі працоўны візіт у Кіеў, падчас якога правялі серыю сустрэч з украінскімі дзяржаўнымі інстытутамі.

Як паведамілі ў прэс-службе арганізацыі, адной з ключавых падзей стаў першы закрыты брыфінг для Міністэрства абароны Украіны, прысвечаны мілітарызацыі Беларусі і пагрозам з боку рэжыму Лукашэнкі.

Таксама адбыўся закрыты брыфінг у Міністэрстве замежных спраў Украіны, дзе абмяркоўваліся ўведзены падчас візіту новы санкцыйны пакет Украіны, тэхнічныя дэталі яго рэалізацыі і перспектывы далейшага ціску на рэжым. Тыя ж тэмы падымаліся на сустрэчы з кіраўніцтвам Упраўлення па справах недружалюбных краін.

Асобна абмяркоўваліся гуманітарныя і праваабарончыя пытанні. На сустрэчы з дарадцам амбудсмена Украіны гаворка ішла пра ўкраінскіх дзяцей, вывезеных у Беларусь з акупаваных тэрыторый, а таксама пра беларускіх добраахвотнікаў, якія ваявалі на баку Украіны і знаходзяцца ў палоне.

У BELPOL заявілі, што галоўным вынікам паездкі стала “супадзенне ацэнак і ўзгодненасць падыходаў да супрацьдзеяння агульным пагрозам”. Паводле ацэнкі арганізацыі, паміж украінскім бокам і BELPOL фарміруецца сістэмнае партнёрства, заснаванае на агульных інтарэсах бяспекі і дэмакратычных перамен.