Лукашэнка прапанаваў адкрыць рэстараны «Мак.бай» у раённых цэнтрах

Рэдакцыя Reform.news · 8 сакавіка 2026, 13:42

https://reform.news/be/lukashjenka-prapanava-adkryc-rjestarany-mak-baj-u-rajonnyh-cjentrah/

Аляксандр Лукашэнка прапанаваў пашырыць сетку рэстаранаў хуткага абслугоўвання «Мак.бай», у тым ліку адкрыць установы ў раённых цэнтрах.

Паводле яго слоў, калі на гэта ёсць попыт, дзяржава гатовая аказаць фінансавую падтрымку з бюджэту на зваротнай аснове.

«Трэба больш зрабіць. Калі патрэбна нейкая капейка — з вяртаннем, ненадоўга. Мы дапаможам з бюджэту, але не на вялікі прамежак часу, — прыводзіць яго словы прэс-служба. — Калі ёсць попыт на гэта, трэба і ў раённых цэнтрах адкрываць».

Лукашэнка таксама выказаўся пра практыку выкарыстання фудтрака — мабільнага рэстарана, які працуе не толькі ў сталіцы, але і выязджае ў іншыя гарады.

«Трэба глядзець на попыт. Калі гэты трак дапамагае, людзі ідуць і ядуць — хай будзе. Калі не — вядома, трэба стацыянар», — дадаў ён.