Прадстаўнікі беларускіх дэмсіл сустрэліся з Сакратарыятам Упаўнаважанага Вярхоўнай Рады Украіны па правах чалавека

Рэдакцыя Reform.news · 3 лютага 2026, 19:12

https://reform.news/be/pradsta-niki-belaruskih-djemsil-sustrjelisja-z-sakrataryjatam-upa-navazhanaga-vjarho-naj-rady-ukrainy-pa-pravah-chalaveka/

3 лютага ў Кіеве дарадца Святланы Ціханоўскай па прававых пытаннях Леанід Марозаў, прадстаўніца па сацыяльнай палітыцы Аб’яднанага пераходнага кабінета Вольга Зазулінская і прадстаўніца дэмакратычных сіл Беларусі ва Украіне Святлана Шаціліна правялі працоўную сустрэчу з Сакратарыятам Упаўнаважанага Вярхоўнай Рады Украіны па правах чалавека.

Бакі абмеркавалі сітуацыю з правамі чалавека ў Беларусі і, у прыватнасці, сітуацыю з палітычнымі зняволенымі, сярод якіх ёсць і грамадзяне Украіны. Таксама абмяркоўвалася сітуацыя з беларусамі, якія падвергліся пераследу за супрацьдзеянне рэжымам Лукашэнкі і Пуціна пасля пачатку поўнамаштабнай агрэсіі Расіі супраць Украіны, гуманітарны і праваабарончы падыход да такіх выпадкаў, паведамляе Офіс Ціханоўскай.

Удзельнікі сустрэчы разгледзелі пытанне прымусовага вывазу беларускіх палітвязняў за мяжу, у тым ліку праз тэрыторыю Украіны, і абмеркавалі магчымую каардынацыю дзеянняў у выпадку працягу такіх практык.

«Для нас прынцыпова важна выбудоўваць прамое і сістэмнае ўзаемадзеянне з украінскімі інстытуцыямі па абароне правоў чалавека. Мы гаворым не толькі пра салідарнасць, але і пра канкрэтныя механізмы рэагавання — у дачыненні да палітычных зняволеных, трансгранічных рэпрэсій і прымусовых перамяшчэнняў. У гэтых пытаннях каардынацыя з офісам Амбудсмена Украіны мае ключавое значэнне.

Мы ўдзячныя Сакратарыяту Упаўнаважанага Вярхоўнай Рады Украіны па правах чалавека за канструктыўную сустрэчу і гатоўнасць да далейшага супрацоўніцтва», — заявіў Марозаў.