Ціханоўская расказала прэзідэнтцы Генасамблеі ААН пра сітуацыю з вызваленнем палітвязняў

Рэдакцыя Reform.news · 21 студзеня 2026, 17:41

https://reform.news/be/cihano-skaja-raskazala-prjezidjentcy-genasamblei-aan-pra-situacyju-z-vyzvalennem-palitvjaznja/

Падчас удзелу ў Сусветным эканамічным форуме ў Давосе Святлана Ціханоўская сустрэлася з прэзідэнткай Генеральнай Асамблеі ААН Аналенай Бербак.

Кіраўніца Аб’яднанага пераходнага кабінета падзякавала суразмоўніцы за падтрымку, якую яна аказвала на сваёй папярэдняй пасадзе міністра замежных спраў Германіі, і выказала надзею, што новая пасада дазволіць прыцягнуць больш увагі да гуманітарных пытанняў і парушэння правоў чалавека ў Беларусі.

Палітык расказала пра сітуацыю з вызваленнем палітвязняў, пра стан бяспекі, а таксама пра праблемы, з якімі сутыкаюцца беларусы. Яна адзначыла ролю ЗША і ЕС у беларускіх пытаннях і выказала надзею, што яны застануцца ў парадку дня ААН.

«Я заўсёды рада сустрэцца і пагаварыць са спадарыняй Бербак. Я вельмі цаню яе працу, рашучасць, актыўнасць і імкненне вырашаць нават самыя складаныя крызісы ў свеце. Генеральная Асамблея ААН — важная пляцоўка для Беларусі, і вельмі важна, каб пытанні, якія хвалююць беларусаў, там абмяркоўваліся і знаходзілі рашэнні», — заявіла Ціханоўская па выніках сустрэчы.