Ласося везлі ў Расію з Беларусі пад выглядам цыбулі
Рэдакцыя Reform.news · 26 снежня 2025, 22:35
https://reform.news/be/lasosja-vezli-rasiju-z-belarusi-pad-vygljadam-cybuli/У Смаленскай вобласці Расіі перахапілі 11,7 тоны рыбнай прадукцыі, якую везлі з Беларусі пад выглядам замарожанай цыбулі.
Мабільная група мытні спыніла грузавы аўтамабіль у Кардымаўскім раёне Смаленскай вобласці. Кіроўца прад’явіў дакументы на перавозку з Беларусі ў Расію хутказамарожанай нарэзанай цыбулі. Пры аглядзе аўтамабіля мытнікі знайшлі скрыні з хрыбтамі і брушкамі ласося.
11,7 тоны рыбнай прадукцыі перамяшчаліся без суправаджальных дакументаў. Кошт грузу ацэньваецца ў больш як 4,5 млн расійскіх рублёў (каля 57 тысяч долараў), паведамляе ФТС РФ.
Смаленская мытня распачала крымінальную справу ў дачыненні да кіроўцы і неўстаноўленай асобы паводле артыкула аб незаконным перамяшчэнні праз мяжу стратэгічна важных рэсурсаў.
