У Беларусі зацвердзілі праграму па выратавальнай і радыяцыйнай бяспецы

Рэдакцыя Reform.news · 17 снежня 2025, 18:35

https://reform.news/be/u-belarusi-zacverdzili-pragramu-pa-vyratavalnaj-i-radyjacyjnaj-bjaspecy/

Урад Беларусі зацвердзіў Дзяржаўную праграму «Інфраструктура бяспекі насельніцтва» на 2026–2030 гады, скіраваную на павышэнне абароны грамадзян і ўмацаванне пажарнай і радыяцыйнай бяспекі. Адпаведную пастанову падпісаў прэм’ер-міністр Аляксандр Турчын.

Агульны аб’ём фінансавання праграмы складзе 452,02 млн рублёў, з якіх 390,02 млн паступяць з рэспубліканскага бюджэту і 62 млн — з мясцовых бюджэтаў.

Праграма ўключае дзве падпраграмы: «Развіццё выратавальнай інфраструктуры», якая прадугледжвае будаўніцтва і рэканструкцыю аб’ектаў МНС для захоўвання і абслугоўвання пажарна-выратавальнай тэхнікі, і «Радыяцыйная бяспека», скіраваную на абарону ад радыяцыйных пагроз, падтрымку аб’ектаў ядзернай і радыяцыйнай бяспекі, а таксама мерапрыемствы, звязаныя з фактарамі Чарнобыльскай катастрофы і функцыянаваннем Палескага радыяцыйна-экалагічнага запаведніка.

“Пастанова падрыхтавана з мэтай захавання бяспекі насельніцтва, нейтралізацыі пагроз нацыянальнай бяспецы, выкліканых наяўнасцю аб’ектаў ядзернай спадчыны”, — гаворыцца ў прэс-рэлізе.