Урад Літвы не мае інфармацыі пра пераезд Офіса Ціханоўскай

Рэдакцыя Reform.news · 11 снежня 2025, 16:42

https://reform.news/be/urad-litvy-ne-mae-infarmacyi-pra-peraezd-ofisa-cihano-skaj/

Ва ўрада Літвы няма афіцыйнай інфармацыі аб магчымым пераездзе з Вільнюса Офіса Святланы Ціханоўскай, паведамляе ELTA.

«Былі розныя абмеркаванні, але такога выразнага заявлення або сігналу, які быў бы афіцыйна паведамлены, урад не атрымліваў», — заявіла прэм’ер-міністр Літвы Інга Ругінене.

«З нашага боку мы забяспечылі Святлане Ціханоўскай і яе офісу ўсебаковую падтрымку і дапамогу. Мы надалі кругласутачную ахову, а далей — ёй вырашаць, што выбіраць», — сказала Ругінене.

Нагадаем, учора з’явілася інфармацыя, што Офіс Ціханоўскай нібыта пераязджае з Літвы. Дарадца Ціханоўскай Франак Вячорка заявіў, што Офіс працуе ў звычайным рэжыме, а ахова лідаркі дэмсілаў была адноўлена.

У кастрычніку гэтага года Літва прыняла рашэнне аб паніжэнні ўзроўню аховы Ціханоўскай. Функцыі аховы перадалі паліцыі ад Службы аховы кіраўніцтва дзяржавы.