Скриншот видео t.me/mchs112by
Падраздзяленні МНС Беларусі за мінулыя суткі ліквідоўвалі наступствы неспрыяльных пагодных умоў, выкліканых снегападамі і моцным ветрам з парывамі да 17 м/с. Па інфармацыі ведамства, на шчасце, пацярпелых няма.
Ратавальнікі аказвалі дапамогу ў расчыстцы ад снегу пад’ездных шляхоў да 417 аб’ектаў сацыяльнай інфраструктуры, у тым ліку да 78 бальніц, 130 дзіцячых садкоў, 62 школ і 147 іншых устаноў. Таксама былі ачышчаны дахі чатырох аб’ектаў — дзіцячага садка, школы і двух іншых будынкаў.
Акрамя таго, ад снежных заносаў было вызвалена 190 аўтамабіляў. Найбольшая колькасць такіх выпадкаў зафіксавана ў Магілёўскай (68) і Мінскай (49) абласцях, а таксама ў Мінску (26).
Да работ прыцягваліся больш за 100 адзінак тэхнікі і звыш 2,5 тыс. чалавек асабовага складу МНС.
Непагадзь прывяла да шэрагу пашкоджанняў аб’ектаў. У Віцебску ў выніку сыходу снегу адбыўся парыў паветрана-апорнай мембраны тэнтавага футбольнага манежа. У Магілёўскай вобласці зафіксаваныя частковыя абвальванні даху кароўніка на малочна-таварнай ферме ў Асіповіцкім раёне і каркаса цяпліцы ляснога гадавальніка ў Бабруйскім раёне. Таксама адзначаліся затрымкі грамадскага і пасажырскага транспарту.