Журы паэтычнай прэміі Наталлі Арсенневай назвала тройкі найлепшых паэтычных кніг 2022 і 2023. Гэта апошні крок перад тым, як мы даведаемся пра назвы найлепшых паэтычных кніг за два апошнія сезоны.
Кароткі спіс за 2022 год:
Альгерд Бахарэвіч, «Вершы» (выдавецтва «Viasna»)
Наста Кудасава, «Побач» (выдавецкая ініцыятыва «Skarynyčy»)
Вальжына Морт, «Песні для мёртвых і ўваскрэслых» (выдавецтва «Пфляўмбаўм»)
Кароткі спіс за 2023 год:
Валянціна Аксак, «Уцёкі з Палесся» (фонд «Kamunikat.org»)
Марыя Бадзей, «Мёд і дым» (выдавецтва «Пфляўмбаўм»)
Ганна Шакель, «Цела мігдалу» (выдавецкая ініцыятыва «Вільма»)
Пераможцаў назавуць на цырымоніі ўзнагароджання, якая адбудзецца 20 верасня, у дзень нараджэння патронкі прэміі Наталлі Арсенневай. Імпрэза пройдзе ў Варшаве, на пляцоўцы партнёра цырымоніі – Моладзевага хаба.
Сёлетні склад журы прэміі:
Дар’я Бялькевіч – паэтка, перакладчыца песень. Яе першы паэтычны зборнік вершаў «Слёзы на вецер» атрымаў прэмію Наталлі Арсенневай за 2021 год.
Міраслава Лукша – журналістка, пісьменніца і перакладчыца, аўтарка кніг паэзіі і прозы.
Аляксандр Распапоў – славіст, літаратуразнаўца, перакладчык, доктар гуманітарных навук, дацэнт Інстытута ўсходнеславянскай філалогіі ва Універсітэце імя Адама Міцкевіча. Сябра Славістычнай камісіі Польскай акадэміі навук і Еўрапейскага філалагічнага таварыства.
Андрэй Хадановіч – паэт, перакладчык, літаратуразнаўца, пераможца прэміі імя Наталлі Арсенневай за 2019 год.
Паэтычная прэмія была заснаваная ў гонар Наталлі Арсенневай, выдатнай паэткі і зоркі літаратуры Заходняе Беларусі, аўтаркі знакавага верша «Магутны Божа», якая працягвала сваю дзейнасць на эміграцыі, уносячы неацэнны ўклад у захаванне і развіццё беларускай культуры і літаратуры. Арганізацыяй прэміі займаюцца Беларускі ПЭН і Міжнародны саюз беларускіх пісьменнікаў, якія выступаюць за падтрымку і развіццё беларускай літаратурнай традыцыі.
Падпісвайцеся на культурныя навіны Reform.news у Telegram
Если вы нашли ошибку, пожалуйста, выделите фрагмент текста и нажмите Ctrl+Enter.