Восенню 2026 года плануецца выхад вялікага альбома Алеся Пушкіна.
Каманда ініцыятараў праекта апрацавала архіў матэрыялаў, звязаных з жыццём і творчасцю мастака і падрыхтавала выдавецкі макет мастацкага альбома.
Будучы альбом на больш як 250 вялікафарматных старонках прадставіць ключавыя аспекты мастацкай дзейнасці Алеся Пушкіна — ад жывапісу і перформансаў да сакральнага мастацтва і грамадскіх акцый.
Адным з важных вынікаў працы над выданнем стала развіццё і напаўненне старонкі-памяці alespushkin.com.
Сёння там прадстаўлена каля 300 твораў Алеся Пушкіна: жывапіс, графіка, перформансы, роспісы, іканапіс, кніжная ілюстрацыя і іншыя працы. У архіўным раздзеле сабраныя інтэрв’ю мастака, даследчыя тэксты, успаміны і матэрыялы пра ягоную творчасць.
Падчас працы значна павялічыўся аб’ём архіва. Удалося сабраць невядомыя або цяжкадаступныя матэрыялы: прыватныя фотаздымкі, перапіску, аўдыёзапісы, сведчанні сучаснікаў, творчыя справаздачы і дакументы. Частка з іх захоўвалася ў прыватных архівах людзей, якія працавалі з мастаком у розныя гады.
Аднак праца над архівам працягваецца, таму каманда праекта просіць дасылаць якасныя фотаздымкі прац, арыгінальныя матэрыялы, дакументы або іншыя сведчанні, звязаныя з жыццём і творчасцю Алеся Пушкіна, на пошту: [email protected]
Праект падтрыманы праграмай ArtPower Belarus і фінансуецца Еўрапейскім Саюзам.
Нагадаем, што 57-гадовы мастак Алесь Пушкін памёр у шпіталі хуткай дапамогі Гродна 11 ліпеня 2023 года. Мастака пахавалі на яго радзіме ў вёсцы Бобр Крупскага раёна.
