Калекцыя "Мова". Фота: luch.by.
“Мова” – новая лімітаваная калекцыя, прысвечаная Міжнароднаму дню роднай мовы і натхнённая ўнікальнай літарай — «у нескладовым», а таксама беларускімі пісьменнікамі – Янкам Брылём, Максімам Танкам і Петрусём Броўкам.
Кожная з трох мадэляў гадзінніка ўтрымлівае ўнікальны ўзор почырку пісьменніка і характэрнае для яго напісанне літары «ў».
У апісанні да мадэляў пішуць, што кожны з гэтых аўтараў «на сваім прыкладзе паказаў, наколькі велічна можа гучаць беларуская мова і як прыгожа яна можа выглядаць на паперы».
У рамках калекцыі тры унісэкс мадэлі гадзіннікаў, кожная з іх выпушчана ў колькасці 70 экзэмпляраў.
Гадзіннікі працуюць на легендарным механізме 1801.1, корпус выраблены з нержавеючай сталі, шкло – мінеральнае. Раменьчык выраблены з натуральнай скуры з цісненнем подпісу кожнага пісьменніка.
Старт продажаў калекцыі гадзіннікаў «Мова» — 21 лютага 2023. «Луч» адкрыў перадзамову на сайце завода. ⠀