Юля Шатун. Фота: Ігар Чышчэня.
9 лютага ў прасторы клуба «MY» ў Познані адкрыецца выстава беларускай фатографкі і рэжысёркі Юліі Шатун. Аўтарка такіх фільмаў як «Заўтра», «Апошні дзень гэтага лета», «Межы» прадставіць фатаграфіі (з) Беларусі ў выказванні пад назвай «Вырай».
Юлія Шатун вядомая ў Беларусі перадусім як кінематаграфістка, але рэжысёрка і сцэнарыстка даўно фатаграфуе, і часта выкладае свае здымкі ў сацсеткі. Як фатографку яе цікавяць моманты звыклай паўсядзённасці, пэўныя станы, у якіх раскрываюцца месца і людзі праз самыя простыя рэчы. Можна сказаць, што Юлю Шатун цікавіць вялікае ў малым, ардынарным — тое, як шмат можа расказаць чалавек, горад, месца ў сваім непастановачным, жывым ды амаль ціхім існаванні.
«Хто са мной добра знаёмы, той ведае, што мяне заўжды, калі гуляем, трэба чакаць, таму што я заўсёды дзесьці спыняюся, каб штосьці сфатаграфаваць, — кажа Юлія Шатун пра свой занятак фатаграфіяй. — У мяне для розных аб’ектаў і сітуацый два інструменты: тэлефон і плёначны фотаапарат, — дадае яна. — Наогул фатаграфаваньне — гэта адзін з маіх любімых заняткаў, які вельмі пасуе майму характару. Ідзеш па горадзе, углядаючыся ў людзей, вуліцы, цені, трамваі. Гэта можна рабіць аднаму, нікому аб гэтым не казаць».
Летась Юля Шатун стала двухразовай пераможцай iPhone Photography Awards 2022. Яе фотаздымкі «Прадавец рыбы на Камароўцы» і «Пякарня Sefa Firini» былі адзначаны ў намінацыях «Серыя» і «Заход».
Юлія цікава распавядае пра свае працы. У прыватнасці, пра сваю серыю пра прадаўцоў рыбы на Камароўцы яна дзеліцца так.
«Я зрабіла [яе] ўзімку […]. Там ёсьць частка на вуліцы, дзе прадаюць рыбу. Я заўсёды саромеюся падыходзіць, размаўляць, купляць, асабліва ў іншых краінах. Але мяне вельмі захапляе гэта культура рынкаў, мітусьні, размоў, ежы, якую бяруць рукамі, рэжуць, узважваюць, каштуюць…».
Здымак, які быў адзначаны ў намінацыі «Заход», аўтарка зрабіла падчас падарожжа на поўнач Турэччыны. Вось яго гісторыя.
«Некалькі дзён мы жылі ў горадзе Трабзон, у ім паўсюль — халмы. Мы дасьледавалі горад і ўвесь час кудысьці падымаліся, пякло сонца, паўсюль чуўся заклік да малітвы, сабакі раптоўна зьяўляліся, і мы паварочвалі ў іншы бок, мужчыны сядзелі на маленькіх табурэтках, пілі чай і моўчкі глядзелі на ўсіх, хто праходзіць побач. У адным з раёнаў побач з закінутай будоўляй аўтастрады стаяў невялікі будынак, на ім было напісана «Sefa Firini”, дзьверы былі адчынены, але ўнутры нікога не было, толькі хлеб ляжаў на палічках…».
Фатаграфія Юлі Шатун — гэта погляд далікатнага чалавека на непрыхарошанае жыццё, узіранне ў свет і час, яго расколінкі.
Пазнаёміцца з цікавай аўтаркай і яе працамі можна будзе на выставе, якая адбудзецца ў познаньскім клубе «MY» па адрасе: Fredry 5/3a. Вернісаж адбудзецца 9 лютага ў 19.30.
Падпісвайцеся на культурныя навіны Reform.by у Telegram